Aatsitassat pillugit nittarsaassinersuarmut Nunatsinnit peqataasut aatsaat taama amerlatigisut
Kunngissaq Frederik, Aatsitassanullu ikummatissanullu naalakkersuisoq Erik Jensen, Danmarkillu nukissiuuteqarnermut ministeria Lars Christian Lilleholt peqataasunut ilaapput.
Kalaallit Nunaat sinnerlugit PDAC-mi peqataasut, Danmarkip Torontomi sinniisoqarfiani pisortatigoortumik tikilluaqquneqarmata KNR aamma peqataavoq:
AAMMA ATUARUK Kuupik V. Kleistip aatsitassarsiorneq pillugu nalunaarusiaq nutaaq qinngulunnaraa
- Kunngissaq Frederik, naalakkersuisorlu Erik Jensen oqalugiarput. Kunngissap nunatsinnik nuannarinninnini oqalugiarnermini pingaartippaa. Sassuma Arnaata oqaluttuarisaanitsinni pingaaruteqassusaa Kunngissap oqalugiarnermini ilaatigut taavaa, pinngortitamik mianerinninnissamut pingaaruteqassusaa oqaatigalugu. KNR-imi suleqaterput Merete Lindstrøm, Danmarkip Torontomi sinniisoqarfiani pisortatigoortumik tikilluaqqusitsinermi malinnaasoq taama oqarpoq.
AAMMA ATUARUK Nunatsinneersut aatsitassarsiorneq pillugu nittarsaassinermi Kunngissamit peqatigineqassasut
Aatsitassat pillugit nittarsaassinersuup PDAC-p Kalaallit Nunaannut pingaaruteqarnerujussua, Aatsitassanut naalakkersuisup Erik Jensenip oqalugiarnermini oqaatigaa, nunatta aatsitassarsiornermi nunanut allanut attaveqarniarneranut PDAC-p qitiulluinnartoq oqaatigalugu. Erik Jensenip ilanngullugu oqaatigaa Kalaallit Nunaannit peqataasut aatsaat taama amerlatigisut.
Nunatta aatsitassarsiornikkut siuarsarneqarsinnaanissaa PDAC-mi peqataanikkut anguniarneqarpoq.
Aatsitassat pillugit nittarsaassinersuaq marsip ulluisa arfernata tungaanut pisussatut pilersaarutigineqarpoq, inuillu 26.000-it pallillugit nunanit 135-neersut alakkaannissaat naatsorsuutigineqarluni.
