Innuttaasunik ataatsimiititsinermi Kuannersuarni suliniut pillugu akerliunerujussuaq
Avaalaartartut, biilit nilliasaataat nilliasut, nipilersuummillu tusarnaartut. Narsami innuttaasunik ataatsimiititsineq ippassaq taamannak aallartippoq.
Atorfilittat, siunnersortit aatsitassarsioqatigiiffimmiillu Greenland Mineralsimeersut Kuannersuarni suliniut pillugu innuttaasunik ataatsimiititsineranni kingullermi tamanna pivoq.
AAMMA ATUARUK Narsami innuttaasunut ataatsimiititsineq taamaatinneqartoq pillugu: Akuersaarneqarsinnaanngilaq
Aatsitassarsiornissamut uraanisiornissamullu akerliusut kamaqqaqaat.
Ataatsimiinnermut isersinnaanani ulikkaarussaasoq, aatsitassarsiorsinnaanissamullu tapersersuisut akerliusorpassuillu aamma naapippagut.
Ataatsimiiffimmut inuit 100-innaat iseqqusaammata inuit 100-it tungaannut katersortarfiup silataani isersinnaanatik avaalaartarput.
AAMMA ATUARUK KNAPK Narsaq Kuannersuit pillugit: Aalisartut tamarmik akerliupput
Ataatsimiigiani suliniummut tapersersuisoqarpoq, naak amerlanngikkaluartut. Taakkununnga Sara Barnabassen akuuvoq. Taanna ernumassuteqanngilaq suliffissaaruttarninilu nuannarinagu akuersaarpoq.
- Suliffissaqarnissaa peqqutigalugu, manna suliffissaqanngilaq. Neqi A/S-imi suligaluaraangatta decembarimi unittarpoq, Sara Barnabassen oqarpoq.
- Akerliussutsimik takutitsisut qakkua ajorinngilakka namminneq piniarlik, iggiarlulerniarlik.
Ataatsimiiffimmut isersinnaanani ulikkaarussaasunut Frank Angmalortoq akuuvoq. Taanna ulikkaarussaanerminut paasinnikkaluarluni suliniut pillugu paasisaqarnerorusukkaluarpoq.
- Aatsaanuna maannartunga, paasivara ulikkaaqqasoq isersinnaanngitsungalu. Kisianni tassa paasiinnarpara taamaattussaasoq.
- Tusarniaasut ilaaffigerusukkaluarakkit. Arlalinnik paasisaqarusukkaluarama paasinngisaqarama.
AAMMA ATUARUK Kuannersuit qanittuanni nersutaatilik: Greenland Mineralsilu isumaqatigiissuteqanngilagut
Ataatsimiititsineq tamaat akerliussutsimik takutitsisut silami nilliammata oqaluttaasoq inersuami ataatsimiiffiusumi igalaap killingani akerliussutsimik takutitsisut nalaanniit akianut pivoq.
Aamma inersuarmi tusarnaartut oqalutaasup nutserineri silami akerliussutsimik takutitsisut nipitugalugit paaserpiarsinnaanagit oqarput.
Malinnaaniarluni ilungersunarsisarami, ingammik oqaatsit assigiingitsut atorneqartillugit, saniatigullu taqqamani nilliasut tusaasuulersorlugit nipilersortut allallu malinnaaniarneq ilungersunartorujussuuvoq taannartaa uggornarpoq, Josef Petersen taama oqarpoq.
Innuttaasut 24-it apeqquteqarusullutik allatsipput taakkunanngalu 14-it angumerineqarput.
