KNAPK Narsaq Kuannersuit pillugit: Aalisartut tamarmik akerliupput
Kuannersuarni aatsitassarsiornissamut suliniut pillugu innuttaasunut ataatsimiititsisoqaleruttorpoq. Ataatsimiititsinerit Narsarsuarmi sapaatip akunnerata siuliani tallimanngornermi aallartinneqarput. Ataasinngornermi Qaqortumi ataatsimiititsisoqarpoq ullumilu marlunngornermi Narsami ataatsimiititsisoqassalluni.
Innuttaasunut ataatsimiititsinerit aallartinnginneranni Narsami aalisartut nalunaarutissaqareerput. Taakku tamarmik aatsitassarsiornissamut suliniummut akerliupput.
KNAPK-p Narsami immikkoortortaqarfiani siulittaasoq, Ole Jørgen Davidsen taama nassuiaavoq.
- Kuannersuiarni aatsitassarsiorfiup ammarsinnaanissaa inuussutissarsiutitsinnut eqquinissaa peqqutigalugu akuerinngilarput.
Kuannersuarni aatsitassarsiorfik pillugu paasissutissat piviusut:
- Kuannersuit Narsap kilometerinik 7,5-inik ungasitsigisumi avannarpasissortaaniippoq.
- Aatsitassarsiorfik asimi 700 meterinik qutsitsigisumiipppoq.
- Greenland Minerals aatsitassarsiornissamut akuerineqassanersoq - qaqugu tamanna pissanersoq ilisimaneqanngilaq.
- Greenland Mineralsip aatsitassarsiorfk ukiuni 37-ni piiaaffiginiarpaa.
- Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
- Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
- Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
- Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut ) 111 millionit tonsiussalluni.
Tusarfik: Pinngortitaleriffik aamma Nationalt Center for Miljø og Energi, IPN-iliaq.
Aalisartut piniartullu Narsami peqatigiiffiata suliniut inuussutissarsiutiminnut kingunerluuteqassanersoq paaserusuppaa.
Aatsitassarsiutileqatigiiffik Greenland Minerals Narsamit 8 kilometerimik ungasitsigisumi aatsitassanik qaqutigoortunik uranimillu piiaarusuppoq.
Sulili aalajangiisoqanngilaq, Naalakkersuisullu Kuannersuarni aatsitassarsiortoqassanersoq aalajangernissaanut piffissaq suli sivisusinnaavoq.
Aatsitassarsiornissaq piviusunngussappat Greenland Mineralsip Narsap avannaani sumiiffimmi piniarneq aalisarnerlu inerteqqutigilissavaa. Suliffeqarfiup aatsitassarsiorfimmit imeq atoriikkanik Ikersuarmut aniatittarniarpaa.
- Narsap Iluani aatsitassarsiorfik ammassappat uagut aalisartutut qulakkeeqqaartariaqarparput inuussutissarsiutitta qanoq eqqorneqarsinnaanera tamakkiisumik paasissallugu. Aalisaqqusaajunnaassaguttami aatsitassarsiorneq sumut iluaqutigissagatsigu?
Sumiiffik piniarfigineqarnissamut aalisarfigineqarnissamullu inerteqqutaalersinnaasoq 300 kvadratmeterinik annertussuseqarpoq.
Politikerinit akissuteqartoqarnissaa amigaatigigaat
Taassuma innuttaasunut ullumi ataatsimiititsineq apeqqumminnik akissuteqarfiunissaa ilimaginngilaa. Ole Jørgen Davidsenimummi akissut politikerinit akissutaassaaq.
- Pappilissat atsiornikut pigerusuppagut, uagut oqaasiinnartigut qaquguluunniit akuersinavianngilagut.
- Kommunemut qinikkatsinnit naalakkersuisuniillu paasititsiniaasoqarneq ajormat amigaatigivarput. Maanaannakkut oqallinnerujussuaq ingerlasoq eqqortumik kiamuna paasitikkusukkaatigut? Tassa taanna amigaaterput.
Naalakkersuisut siorasaarisoqarnikuunera pissutigalugu innuttaasunut ataatsimiititsinernut peqataaniarnatik aalajangernikuuvaat. Ataatsimiititsinernulli Greenland Minerals, Namminersorlutik Oqartussani atorfillit Danmarkimilu Nationalt Center for Miljø og Energimit peqataasoqarpoq.
KNAPK-p Narsami immikkoortortaqarfia 30-nik ilaasortaqarpoq.
