57-inik ukiulik, Sofus Frederiksen, Narsap Iluanut Kuannersuit ataanniittumut sapaammi ullaap tungaani nersutaasivimminukarpoq. Nersussutaatini 250-iusut nerukkariartorpai. Taanna nunatsinni amerlanerpaanik nersussuaateqarpoq.

Kuannersuit Sofus Frederiksenimut sunniuteqartorujussuusinnaavoq, taassumami nersutaasivia aatsitassarsioqatigiiffiup Greenland Mineralsip aatsitassarsiulersaarfianit kilometerit marluk missaannik ungasitsigisumiippoq.

Assi © : KNR / Malik Brøns

Aatsitassarsioqatigiiffik aatsitassarsiorfimmik asimi pilersitserusuppoq, mingutsitsisoqaratarsinnaaneratalu ernummatigineqarnera Sofus Frederiksenip nersutaasivianut siunissami akornutaasinnaaavoq. Greenland Mineralsip Sofus Frederiksenip nersutaasiavianik pisiarinninnissaa periarfissaasinnaasut ilagaat, aatsitassarsioqatigiiffimmeersullu oqarnerat naapertorlugu Sofus Frederiksen nersutaasivia pillugu pisortatiguunngitsumik oqaloqatigisareersimavaat.

AAMMA ATUARUK Titartagartat: Qaqqamiit assartuinermut – GM-ip urani aatsitassallu qaqutigoortut Kuannersuarnit ima piiarniarpai

Aatsitassarsioqatigiiffiup Sofus Frederiksenip nersutaasivia pisiarissallugu ilimagaa, qanorli akeqarsinnaaneranik isumaqatigiissimanatik.

Sofus Frederiksenillu qanoq akeqassanersoq aamma naatsorsorsimanngikkini pisiarissappassulli tamanna aalajangerumaarini, taanna oqarpoq. Qanorlu akiliitigiumaarnersut inuttaata aamma eqqoriarusunngilaa.

- Pigisaq koruunilersimasaq 25 oorilersillugu tunineqaannapajunneq ajorpoq, taanna oqarpoq.

Tunngaviatigut akerliunngitsoq

Sofus Frederiksen aatsitassarsiulersaarnermut tunngaviatigut akerliunngilaq, aatsitassarsiorfilli pinngortitamut ajoqutaassappat akerleralugu. Aatsitassarsioqatigiiffik akuerisaanersoq apeqqutaatinngikkaluarlugu politikerit tatigalugit, taanna oqarpoq.

Nersutaatini suli amerliartuinnartut aalajangertoqarnissaata tungaanut nakkutiginiarpai. Namminersorlutik Oqartussanit tapiiffigineqarani sinneqartooruteqartalernissani taassuma angorusuppaa.

Assi © : KNR / Malik Brøns

- Uanga toqqaannartumik akerlerinngilara, uanga taamak paasisimasaqartiginnginnama. Uloriasaarinerit ersisaarinerillu annertoorujussuarmik atorneqarput. Kisianni politikerit upperivakka, taakkumi oqarput avatangiisinut assigisaannullu ajorpat ammarneqarnavianngitsoq.

Sofus Frederiksen nersutaateqarnerminut Namminersorlutik Oqartussanit tapiiffigineqartarpoq. Tapiiffigineqartarunnaarusuppoq, tamatumalu angunissaanut ukiut marluk missaannaat amigaatigigini oqarpoq.

AAMMA ATUARUK Borgmesteri Kuannersuarni kemi atorlugu arrortitsivinnut naaggaartoq

Aatsitassarsiulersaartoqarnerali inuttaanut ulluinnarni kalluivoq. Tamannami nersutaasiveqarunnaarneranik kinguneqarsinnaammat, Greenland Mineralsilu aatsitassarsiornissamut akuerineqassappat aallaqqaataaneerusunnani. Taannami isumaqarpoq, taamaaliornissaminut ukioqqortusivallaarsimalluni.

- Inuusuttuugaluaruma allami nersutaasivittaarnissannut nukissaqassagaluarpunga, inuusukkunnaareeramali allamut nooriarlunga aallaqqaataaneersinnaanissara ilimaginngilara, Sofus Frederiksen oqarpoq.

Kujataani 1997-imi nunalerisunngorpoq. Savaateqarfimmi sulineq inuusuttuaraallunili ilitsoqqussaraa, allarpassuillu assigalugit savaatilioqqaariarluni pingasunik 2004-mi nersutaateqalerpoq.

Nersutaasivittaarnissamik isumassarsigamili aallutilerpaa. Maanna 250-it missaannik nersussuaateqarpoq, taakkunanngalu 58-inik siorna toqoraaviliaassivoq.

Savaatillit akerliusut

SPS, tassa Savaatillit Peqatigiiffiit Suleqatigiissut, Kuannersuarni aatsitassarsiornissamut suliniummut akerliupput. Nunatta kujataani savaatileqarpoq, Narsamili savaateqartoqarani. Taamaakkaluartoq nunaatillit kangerlunni Narsap eqqaani savaateqarput.

Savaatillit aatsitassarsiorfimmiit pujoralaat savaateqarfinnut apuuttarsinnaanissaat ilaatigut ernummatigigaat, SPS-ip siulittaasua Lars Nielsen oqarpoq.

- Pujoralak eqqarsaatigalugu pujoralak killilersorsinnaanavianngilaat. 

Peqatigiiffiup Greenland Mineralsip aatsitassarsiorsinnaaneq pillugu nalunaarusiai atuaraluarlugit suli paasiuminaatsippai. Taamaattumik Lars Nielsenip Kuannersuarni aatsitassarsiortoqalissagaluarpat savaatilinnut qanoq kinguneqarsinnaanera siulittoruminaatsippaa.

- Annertunerusumik ilisimasagut killeqarnermik. Taakku atuagassat 800-t tungaannut qupperneqarput, atuagassat oqimaatsorujussuupput, suli atuarpagut.

Savaatillit peqatigiiffiat 70-it missaannik ilaasortaqarpoq