Borgmesteri Kuannersuarni kemi atorlugu arrortitsivinnut naaggaartoq
Greenland Minerals kemi atorlugu arrortitsiviliornissaminut akuerineqassaguni kommunalbestyrelsemit akerlerineqassaaq.
Kommune Kujallermi borgmesteri, Kiista P. Isaksen, taama siulittuuteqarpoq.
Kommunalbestyrelsip kissaatiginngikkaluaraa, aatsitassarsiorfimmi kemi atorlugu arrortitsiviliortoqarnissaa aallaavigalugu avatangiisinut sunniutaasinnaasut pillugit nalunaarusiortoqarsimasoq borgmesteri oqarpoq.
Kuannersuarni aatsitassarsiorfik pillugu paasissutissat piviusut:
- Kuannersuit Narsap kilometerinik 7,5-inik ungasitsigisumi avannarpasissortaaniippoq.
- Aatsitassarsiorfik asimi 700 meterinik qutsitsigisumiipppoq.
- Greenland Mineralsip aatsitassarsiorfk ukiuni 37-ni piiaaffiginiarpaa.
- Aatsitassarsiorfiup piiaaffigineqarnerani nunaqavissunik 328-nik suliffissaqartitsisoqarsinnaassasoq naatsorsuutigineqarpoq.
- Aatsitassarsiorfik qaqutigoortunik ilaatigut uranimik thoriumimillu saffiugassaqarpoq.
- Aatsitassarsiorfik saffiugassiassamik ukiumut millionit tonsit pingasut missaannik piiaaffiusassaaq.
- Ukiuni 37-ni aatsitassarsiornermit sinnikut 111 millionit tonsiussapput qaarsorlu (qaarsumit piiarneqartumit sinnikut ) 111 millionit tonsiussalluni.
Tusarfik: Pinngortitaleriffik aamma Nationalt Center for Miljø og Energi, IPN-iliaq.
- Inuit uumasullu peqqissusaasa, pinngortitap avatangiisillu uloriarnartorsiortinnginnissaat pingaaruteqarmat, mingutsitsinnginnissarlu pingaaruteqarmat, kemi atorlugu arrortitsivinnik maani nunatsinni aatsitassarsiornerni ingerlatsisoqassappat, qularutiginngilara uagut kommunerput naaggaartussaassasoq, Kiista P. Isaksen oqarpoq.
AAMMA ATUARUK NOAH: Kuannersuarni seernartulinnik kinitsiviliorusunneq isumaqanngilluinnarpoq
Greenland Mineralsip aatsitassarsiornermut suliniutaa maanna tusarniaassutigineqarpoq, aatsitassarsioqatigiiffillu Namminersorlutik Oqartussanit atorfilittat peqatigalugit Kujataani innuttaasunut ataatsimiititsivoq.
Borgmesterilli avatangiisinut sunniutissat pillugit naliliinermut naammaginninngilluinnarpoq.
- Nalunaarusiami pinngoqqaatinut ajornartorsiutaasinnaasut - avatangiisinut sunniutigisinnaasaata - allaatiginera naammaginanngitsutut ajoraluartumik nalilerpara. Taamatullu aatsitassat sinnikuinik igitassiassat puttallartitsivinneersut aamma kemi atorlugu arrortitsivinneersut inissiiniarnerat suli iluarsisarialimmik ajornartorsiutitaqarput, Kiista P. Isaksen oqarpoq.
AAMMA ATUARUK Naalakkersuisoq: Kuannersuarni seernartulinnik kinitsivik isumassarsiatsialaavoq
Kemi atorlugu arrortitsiveqarpat aatsitassat piiarneqartut sapinngisamik amerlanerpaat nunatsinni suliarineqarsinnaassasut, taamaalillunilu suliffissat nunattalu karsianut isertitassat amerlanerussasut, aatsitassanut naalakkersuisoq Jens Frederik Nielsen (D) siusinnerusukkut oqarpoq.
Aatsitassat qaqutigoortut assartornissaasa tunisassiarinissaasalu ajornannginnerulernissaat anguniarlugu Greenland Minerals seernartulinnik kinitsivinnik marlunnik sanaartorusuppoq.
Seernartulinnik kinitsiviit marluk malmimik 3 millionit tonsit missaannik oqimaassuseqartumik aatsitassarsiorfimmit ukiut tamaasa piiarneqartussaassangatinneqartumik suliaqarnermut atorneqartassapput. Atortorissaarutit taakku akoorutissat kemikaliat 100.000-it 300.000 tonsillu akornanniittut ukiut tamaasa atortassavaat.
Arrortitsiviilli peqqissutsimut avatangiisinullu akornutaassanngitsut nangilluni oqarpoq.
Arrortitsiviilli ajoqutigisinnaasaat aamma isigineqarniartariaqartut, Kiista P. Isaksen isumaqarpoq. Suna tamaat pilliutigiumanagu Naalakkersuisunik ukiuni kingullerni ataatsimeeqateqartarnermini kommunimit oqaatigisarsimagaat, taanna oqarpoq.
AAMMA ATUARUK Doris J. Jensen Kuannersuarni CO2-mik aniatitsisinnaanermut: Toorneriinnaavoq
- Pinngortitaq illersorniarlugu inuussutissarsiutit pioreersut nutaat soorlu aalisarnerup, nerisassiornerit takornariaqarnerullu iluanni ineriartortinneqarnerat eqqarsaatigalugit kemi atorlugu arrortitsiviit sapinngisamik pinngitsoortinniarneqartariaqarput.
- Taamaammat kemi atorlugu arrortitsivik kissaatiginngiivipparput, Kiista P. Isaksen oqarpoq.
Kommunimiilli qanorluunniit isumaqaraluarpata Naalakkersuisut naggataatigut aalajangiisussaapput.
