Narsami innuttaasunut ataatsimiititsineq taamaatinneqartoq pillugu: Akuersaarneqarsinnaanngilaq
Narsami innuttaasunut ataatsimiititsineq ullumi nalunaaqutaq 19.00 aallartissaaq. Innuttaasunut ataatsimiititsinerit marluusussaagaluarput, silali ajornera pissutigalugu Namminersorlutik Oqartussat Greenland Mineralsilu kinguaattoorput. Ataatsimiititsisussat Narsamut tikipput.
Narsamili inuit innuttaasunut ataatsimiititsinernut marlunnut qilanaaraluarput. Taamaammat Narsami innuttaasunut ataatsimiititsinerit ataasiinnaasussaanera taxartitsisup, Pavia Peter Fontainip uggoraa.
- Uggornalaarpoq ataasiinnaanera, taava unnummut ilimagivara pilerngutilaartussat aggertussat, inissat taakku apeqqutaanermut.
- Peqataaniarsarissuunga inissaqarpat. Inissat aamma apeqqutaasarmata. Marloriasinnaassagaluarpat iluassagaluarpoq.
Paninnguaq Davidsen 24-nik ukioqarpoq, taanna innuttaasunik ataatsimiititsinermut unnugu aamma peqataaniarlugu eqqarsarpoq. Innuttaasunilli ataatsimiititsinerit ataasiinnaasussaanera aamma uggoraa.
- Isumaqarpunga tulluanngittoq taamatut ataasiinanngortinneqarnissaa, ingammik maani Narsami uranisiorniartut. Taava ilaarusunnaraluaqaaq malinnaallunilu, ataasiinnanngortinneqarnera inissanik killeqarami, taanna akuerisinnaanngilara.
Innuttaasunut ataatsimiititsinermi inissaqarnissaq neriuutigigaa
Margrethe Petersenip innuttaasunut unnugu ataatsimiititsisoqarnissaanut inissaqarnissani qulakkeerniarlugu takkutiaarnissani eqqarsaatigaa.
- Uanga isumaqarpunga ajorluinnartoq, isumaqaraluarpunga marluusussaasut pinngitsooratik, taanna uggornarpoq siulleq peernikuummat. Maani nunaqavissuusugut pinngitsuuvinnata oqariartuutissagut tamatta paasilluarneqartariaqarvikkamik. Uagutsinnut manna Narsaq pingaaruteqartorujussuugami.
- Soorunami, siulliunianngikkaanni ajornaqaaq.
Narsami innuttaasunut nalunaaqutaq 19.00-imit ataatsimiititsineq katersortarfimmiittussaavoq, tassunga inuit 100-it peqataasinnaapput.
Mette Clausen atisaarniarfimmi, Polarmagasinami aqutsisuusoq aamma pakatsivoq.
- Isumaqarpunga pitsaanngitsoq. Ataatsimiitsitsiartortut maaniinnissartik sivitsortariaqaraluaraat isumaqarpunga, ataatsimiititsinerit taamaalillutik marluusinnaassallutik, qularinngilarami katersortarfimmi ataasiaannartumik ataatsimiititsisoqarnissaanut amerlavallaat takkukkumaartut.
Allanik innuttaasunik sapaatip akunnerani matumani ataatsimiititsinissamut pilersaaruteqanngitsoq
Innuttaasunik ataatsimiititsinernik nutaanik sapaatip akunneranut matumanut aaqqissuussisoqarnissaanut pilersaaruteqartoqanngitsoq, aatsitassanut naalakkersuisoqarfiup pisortaata, Jørgen Hammeken Holmip oqaatigaa.
- Aqagu aallassaagut, Air Greenlandilli Narsamit aqagu aallarnissarput taamaatissappagut misissuissaagut, pisortaq oqarpoq, neriorsuiniarnanili.
- Politikerit peqataaffigisaannik innuttaasunut nutaamik ataatsimiititsisoqarumaarpoq, Jørgen Hammeken Holm oqarpoq.
Greenland Mineralsip aatsitassanik qaqutigoortunik uranimillu piiaaniarnera tassa Kuannersuarni aatsitassarsiornissamik pilersaarut pillugu Narsami innuttaasunut ataatsimiititsineq siulleq nalunaaqutaq 14.00 aallartittussaagaluarpoq.
Sialli ajornera pissutigalugu Narsami ataatsimiititsinissanit marlunnit siulleq taamaatiinnarneqarpoq. Ataatsimiititsiartortummi Qaqortumiit Narsamut qulimiguulimmik ingerlasussaagaluarput, Air Greenlandilli aallarnissaq marlunngornermi ullaakkut taamaatippaa. Taamaammat ataatsimiititsisussat Narsamut umiatsiarlutik marlunngornermi nalunaaqutaq ullup qeqqanut aatsaat aallarput.
