Demokratip aqqani tamanna akuersaarneqarsinnaanngilaq!
Naalakkersuisunut ilaasortat arlallit Inatsisartullu siulittaasuata utaqqiisaagallartumik ineqartinneqarnerannut atatillugu maannamut najugarisimasaasa iluarsaanneqarnissaannut, Inatsisartullu siulittaasuata nutaamik illoqalernissaa ilanngullugu 13-it millionit koruuninik aningaasaliissutigineqarnissaannut aalajangiineq politikkikkut naliliisartumit tupigineqarpoq.
Tamat oqartussaaqataanerat matumani sumiginnarneqarsimanera ilaatigut oqaatigineqarluni. Politikkikkut naliliisartoq Jakob Janussen taama oqarpoq.
- Aningaasartuuteqarnissamik qinnuteqaat tamanut ammasuunngitsumik naqissuserneqarsimasoq tusarakku eqqarsariaallappunga: Sooruna taamaattoqartoq? Tassami nalunngilarput nalinginnaasumik pissusiusoq aningaasartuuteqartoqarsinnaanngitsoq aningaasartuuteqarnissamut akuersisartut apereqqaartinnagit, tamannalu nalinginnaasumik pisarpoq kikkut tamarmik nalunngisaannik avammut tusarliunneqarsinnaasumik, politikkikkut naliliisartoq Jakob Janussen oqarpoq.
Ineqarnermut, Attaveqarnermut Angallannermullu Naalakkersuisoqarfiup Naalakkersuisunut isertuussamik allagaanni atuarneqarsinnaavoq Naalakkersuisut najugaqarfii sisamat najugaqarfigineqanngitsut tunineqartariaqarlutillu, isaterneqarlutik sanaqqinneqartariaqarlutillu.
- Sooruna taama nukinginnartigisoq? Inoqaterpassuagut oqulimmi najugaqarlutik naammagittaalliorput, taavalu inigisami aaqqissuunneqarnissaanut utaqqillutik.
- Kisianni Naalakkersuisunut ilaasortat Inatsisartullu siulittaasuat Josef Motzfeldt pineqartillugu imaaliallaannaq taakkua qanoq iliuuseqarfigineqarnissaat anguniarneqarpoq. Eqqarsarpunga: Inuit kikkulluunniit assigiimmik pineqartussaanerannik oqartarneq atuutinnginnguatsiarpoq, inuit arlaat uagutsinnit allanit pingaarnerusutut isigineqannguatsiarput, Jakob Janussen oqarpoq.
