Demokraatit politikerit aningaasarsiaat millisarniaraat

Nunarput aningaasameerpoq, nunarpullu sipaartariaqarluni. Politikerillu maanna aningaasaataat sipaarniarneqalerput.

Inatsisartunimi ilaasortat aningaasarsiaat ilaasortaajunnaarnersiaqarsinnaatitaanerallu Demokraatit ikilisarniarpaat, tassaasut aningaasat taakku politikerit tunuaraangamik pisartagaat.

Siunnersuulli taanna Inuit Ataqatigiinniit, Partii Naleqqamit Siumumiillu ilalernartinneqanngilaq.

Politikerit qaammat ataaseq akissarsiaqarnissaminnut qulakkeerneqareertarnerat naapertuuilluarnerunngilaq, naak aatsaat qaammatip naalernerani politikeritut sulilertartut.

Politikerillu tunuaraangamik ukioq ataaseq ilaasortaajunnaarnersiaqarsinnaatitaasariaqanngillat.

Demokraatit Randi Vestergaard Evaldsenilu taama isumaqarput.

- Politikeritut unikkaangatta politikeritut sivisuallaamik akissarsiaqartinneqartarpugut, akissarsinerullu tungaatigut isumaqarpunga quianaannartoq qaammammut ataatsimut suliaqanngiffinnut akissarsitinneqassallunga. Suliffeqarfinnimi allani taama pisoqartarunanngilaq, Randi Vestergaard Evaldsen oqarpoq.

Ilaasortaajunnaarnersiaqarsinnaatitaanermut inatsit qaammatinut arfinilinnut appartikkusuppaa qanorlu sivisutigisumik Inatsisartuni issiasimanerluni apeqqutaatillugu naatsorsorneqartassalluni.

Siunnersuut itigartivinneqartoq

Inuit Ataqatigiit politikkikkut oqaaseqartartuata Naaja Nathanielsenip inatsit allanngortikkusuppaa taamaasilluni Inatsisartuni aatsaat aallartereeraanni akissarsisoqartalissasoq.

Kisiannili ilaasortaajunnaarnersiaqarsinnaatitaanermut inatsit allanngortinnissaanut akerliuvoq. Inuusuttummi politikkimut soqutiginninnerat millisinnaammat, taanna taama isumaqarpoq.

- Siunnersuutip politikkimi kinguaariinnut nikinneq ajornarnerulersissinnaavaa, tassami inuusuttut politikerinngornissartik pilerigiunnaarsinnaavaat. Uanga nammineerlunga siunnersuutigisinnaavara qaammatinik arfineq pingasunik tamanut ilaasortaajunnaarnersiaqarsinnaatitaanissaq, Naaja Nathanielsen oqarpoq.

Hans Enoksenip Partii Naleqqameersup siunnersuut itigartivippaa. Aningaasat politikerimit tunuarnermit atorfissaqarluartut taassuma oqaatigaa.

- Tassa Inatsisartunut ilaasortaagaanni naalakkersuisuusimagaanni aamma atorfittaarniarnerit imaaliallaannagassaajunnaartarput. Tassa politikkimi sumi inissisimaneq aamma qalipaatinngortinneqartarmat taamaalilluni ingerlaannartumik atorfissarsinnaasaratik.

Tunngavilersuutit paasiuminaatsinneqartut

Randi Vestergaard Evaldsenilli tunngavilersuutigineqartut paasiuminaatsippai:

- Naluara suna tunngaviginiarneraat. Demokraatinimi ilaasortaasimasut tunuaraangamik ingerlaannaq sulileqqittarput ukiorlu ataaseq utaqqinikuunatik. Suliffittaajaartartut suliffittaajaarnerluunniit ajortut akornanni suut assigiinngissutaasinnaanersut ilisimanngilakka, immaqa pikkorissuseq, allamilluunniit pissuteqarsinnaanersoq, Randi Vestergaard Evaldsen, Demokraatineersoq, oqarpoq.

Politikeri qaammammut suli akileraartinnani 35.000 koruuninik ilaasortaajunnaarnersiaqartinneqartarpoq.

Siunnersuut maannakkut suliarineqarpoq.