Demokraatit pissaaneqarnerulerput
Olga P. Berthelsen, Inuit Ataqatigiinneersoq siulittaasuujunnaarluni Demokraatineersoq aningaasaqarnermut ataatsimiititaliami Andreas Uldum siulittaasunngorpoq. Andreas Uldum Aningaasaqarnermut ataatsimiititaliami siulittaasup tullersortaatut upernaaq manna ivertinneqartoq tassa maanna siulittaasutut qaffatsinneqarpoq.
Inatsisartut siulittaasoqarfiata kissaatigisimavaa ataatsimiititaliat ikilisarneqassasut. Tassalu tamanna Inatsisartuni ualigaatsiartoq matoqqasumik eqqartorneqarmat ataatsimiititaliat arfinilinnik ikilineqarlutik nutaanik ilaasortanik siulittaasunillu toqqaasoqarpoq. Tamatumunnga ilutigitillugu ataatsimiititaliat pingaaruteqarnerit ilaasortaat aamma amerlineqarput.
Allannguinerit arlaqarput
Ataatsimiititaliat arlallit kattunneqarnerisa kingorna maanna ataatsimiititaliat aqqaniliinnanngorput, tamannalu Demokraatit siulittaasuuffigisaannik arsaarinninnermik oqaatigineqarsinnaavoq, naak aningaasaqarnermut ataatsimiititaliami siulittaasuuffik Inuit Ataqatigiit Demokraatinut tunniukkaluarlugu taamaattoq IA-kkormiut maanna qulingiluanik siulittaasuuffeqalerput.
Ataatsimiititaliat siulittaasuinik nikerartitsinermi soqutiginaateqarnerpaanut ilaavoq kukkunersiuinermut ataatsimiititaliami Naaja Nathanielsen Harald Biancomit taarserneqarmat. Naaja Nathanielsenili ataatsimiititaliani pingasuni siulittaasuussaaq pingaarnertut siulittaasuuffigissallugu inuussutissarsiornermut ataatsimiititaliaq.
Aningaasaqarnermut ataatsimiititaliami siulittaasuuffiup Demokraatinit tiguneqartup saniatigut Demokraatit siulittaasuuffigilerpaat Nunanut allanut sillimaniarnermullu ataatsimiititaliaq, tassani Justus Hansen siulittaasunngorluni.
Inatsisartuni illuatungiliuttut siuttuata, Aleqa Hammondip Naalakkersuisooqatigiit agguataarinerat tupigaa.
- Demokraatini politikerit pikkorissut misilittagaqarluatullu, soorlu Astrid Fleischer Rex aamma Niels Thomsen siulittaasuuffinnik tunineqannginneri tupinnaqaaq, Aleqa Hammond Radioaviisimut oqarpoq.
Niels Thomsen Akileraaratarnermut ataatsimiititaliami, maanna Aningaasaqarnermut ataatsimiititaliamut ilanngunneqartumi siulittaasuugaluarpoq.
Soorlu ilisimaneqartutut Atassut Siumullu suleqatigiinnissaminnik sapaatip akunnera kingulleq atsioqatigiipput, tamanna pivoq Naalakkersuisooqatigiit Atassutikkunnik suleqateqarnertik atorunnaarsimmassuk.
Inatsisartuni ilaasortat Atassutikkunneersut ataatsimiititaliani pingasuni ilaasortaatitaqalerput, Aningaasaqarnermut ataatsimiititaliami Siverth K. Heilmann ilaasortanngorluni.
- Aningaasaqarnermut ataatsimiititaliami ilaasortat partiinit amerlanerpaanit ilaasortaaffigineqarnissaat pisariaqarsorigatsigu, Siumumit ilaasortaaffissarput ataaseq Atassutikkunnut tunniupparput, Siumup siulittaasua Aleqa Hammond oqarpoq.
Aningaasaqarnermi ataatsimiititaliami Siumukkunnit ilaasortaaginnassapput Finn Karlsen aamma Per Berthelsen sinniisussaalluni Jens Immanuelsen.
Aningaasaqarnermut Ataatsimiititaliami siulittaasuusimasup tullersortaasimasullu paarlaanneri eqqaassanngikkaanni, tassani ilaasortatut ingerlaannassaaq Juliane Henningsen, Inuit Ataqatigiit. Aqqaluaq B. Egede nutaatut tassani ilaasortaalerluni.
