Demokraatit Niels Thomsen akerlilerpaat
![](/sites/default/files/styles/image_934x467/public/article_images/niels_thomsen_630.jpg?itok=OBCOIxX5)
- Imatut oqaatigerusuppara: Suliani ataasiakkaani nammineq isummersinnaaneq periarfissaavoq taamaasiornissamullu Niels Thomsen akuerisaakutsoorpoq. Isumaqatigiissutaasorlu tassaavoq gruppemi ilaasortat allat Naalakkersuisooqatigiit aningaasanut inatsisissatut siunnersuut tapersermassuk, Demokraatit siulittaasuat Jens B. Frederiksen oqarpoq.
Parteqataasut allarluinnarmik isummernissaat tikillugu Niels Thomsenip siunnersuutaa Siumukkut suleqatigalugit akuerineqalersutut isikkoqaraluarpoq.
Taamatullu pisoqarpoq sapaatip akunnera kingulleq Ilaqutariinnermut Naalakkersuisumut Mimi Karlsenimut tatiginnikkunnaarluni taasisoqarmat Niels Thomsen taaseqataanngereersoq.
Demokraatit akornanni aaqqiagiinngittoqalernerluni?
- Taamatut isumaqanngivippunga, Jens B. Frederiksen oqarpoq.
Taavami sungiunniartariaqalissavarput Demokraatit taasigaangamik akerleriittarnissaat?
- Isumaqarpunga assigiinngitsunik taasisarneq ileqqorinngikkipput, soorunami nalilersorneqarsinnaavoq isumaqatigiinnissaq qaqugukkut pingaarnerunersoq. Taamaattumik gruppemi pingaartissimavarput aningaasanut inatsisissaq ataatsimoorluni tapersernissaa, Jens B. Frederiksen oqarpoq.
Naak Niels Thomsen parteeqatiminit allaanerusumik sapaatit akunnerisa marluk ingerlanerinnaanni marloriarluni isummeraluartoq tamanna ajornartorsiutaanngitsoq Jens B. Frederiksen oqarpoq.
- Niels Thomsen politikkikkut oqaaseqartartutut oqaaseqaraangami partii sinnerlugu oqaaseqartarpoq aammali ilaasortatut nammineq isummersinnaatitaavoq, tamatumalu ingerlatiinnarnissaa pingaarpoq, Jens B. Frederiksen oqarpoq.
Kisiannimi taamaappat nalorninarsissanerlu Demokraatit suna politikkerineraat sunalu Niels Thomsenip politikkerineraa?
- Taama pisoqarsinnaasassaaq kissaatigilluinnakkamik siunnersuuteqaraanni tamatumalu malersornissaa pisinnaatitaaffiuvoq, Jens B. Frederiksen oqarpoq.
Gruppemi siulittaasoq Justus Hansen oqarpoq gruppemi suliassaq ajornakusoorsinnaasartoq illuatungeriit naapisinniarlugit.
- Kikkulluunniit takusinnaasarpaat isumaqatigiinngilaartoqarnera. Tamannali aamma inissaqartittariaqarpoq aamma uanga gruppemi siulittaasutut inassutigaara taasinermi uummat malinneqartassasoq, Justus Hansen oqarpoq.
- Isumaqarpimmi Niels Thomsen gruppemi siulittaasussatut piukkunnartoq amerlanerussuteqartunut akerliuguni?
- Uani suliani marlunni isumaqatigiinngissimavugut, kisianni suliani allani isumaqatigiittarpugut aamma uanga ajornartorsiutissaqartinngilara politikkikkut oqaaseqartartutut ingerlaannarnissaa, Justus Hansen oqarpoq.
Niels Thomsenip suliat pillugit imaluunniit Demokraatini isumaqatigiinnginneq pillugu oqaaseqarumanngilaq.