Demokraatit Naalakkersuisut tapersinngikkaat

Nunattami sullivinni avatangiisinik isumannaallisaaneq akisussaaffigilerpagu, suliffeqarfiit pinngitsaaliissummik akitsuutinik naalakkersuisut siunnersuuteqarnerattut akilersuisuutinneqassanngitsut, Demokraatit politikkikkut oqaaseqartartuat Justus Hansen oqarpoq.

- Suliffeqarfiit qanorluunniit iliornikkut akiliisussanngortinneqaraangata naggataatigut atuisartut eqqugaajuaannarput. Suliffeqarfiimmi namminneq aningaasartuutitik aamma matussusertartussaavaat.

Taamaammat sullivinni avatanngiisinik isumannaallisaanerup qanoq allatut aningaasalersorneqarsinnaaneranik, naalakkersuisut pilersarummik nutaamik  saqqummiussinissaat Justus Hansenip piumasaqaatigaa. 

Akiussaaffimmi nunatta ilumut tigussappagu. taamaaliussanersugummi, Demokraatineersup nalornissutigaa.

- Isiginneriaaserpummi soorunami imaappoq, suliassaqarfimmik tigussinikkut suliat pitsaanerulertariaqartut, aningaasartuutigut qaffannatik. Taamaammat uunga siunnersuummut allatut aningaasalersueriaatsimik naalakkersuisut ujartuinissaannik kajumissaarpakka. Taamaaleriarpallu akisussaaffimmik tigusisinnaanersugut soorunami isummerfiumaarpara.

Suliassaqarfiullu sumit aningaalersorneqassarsinnaaneranik Justus Hansen nammineerluni siunnersuutissaqanngilaq. 

Nunatsinnili suliffeqarfiit pingaartumik Nuup avataaniittut misissuiartortunik alakkarneqartarisigut, suliffeqarfiit danskillu sullivinni nakkutilliisoqarfiata qanimut suleqatiissutiginerunissaannik ujartuineruvoq.

Tamannalu pisinnaavoq Danmarkip nakkutilliineq aningaasaliiffigineruppagu.

- Sullivinni nakkutilliisut sinerissap sinnerani alakkarterivallaartannginnerat ajornartorsiutaavoq. Aqqutitsialaasinnaavorlu, danskit naalagaaffiat suliamut aningaasaliinerunissaa  kimigiiserfiginngikkaluarluni oqaloqatigineqarsinnaappat.

Inuussutissarsiornermut, Suliffeqarnermut Niuernermullu Naalakkersuisup avannaani angalanera peqqutigalugu suliamut tunngasumik oqaaseqartissinnaanngilarput.