Demokraatit kommunalbestyrelsimi aqutseqataaqqilersut Naleqqakkut anipput

Demokraatit kommunalbestyrelsemi siuttunut ilannguteqqipput.

Inuit Ataqatigiillu suleqatigiinnissaminnik nutaamik isumaqatigiissuteqarput. 

Taama kommuni tusagassiorfinnut nalunaarpoq.

Partiit taakku marluk – kingumut – illoqarfiit pingaarnersaata kommunerujussuani pissaanermik taamaasillutik ataatsimoorlutik tiguseqqipput.

Ukiut aappaata qeqqa qaangiutiinnartoq Inuit Ataqatigiit kommunalbestyrelseani suleqatitik taarseqqippaat. Taamani Demokraatikkut suleqatigiunnaarlugit – IA Nalerarlu suleqatigiinnissamik isumaqatigiissuteqarfigaat.

Demokraatit maanna isumaqatigiissusiorfigineqarput Naleraq siuttutut suleqatigiunnaarneqarluni.

- Inuit Ataqatigiinnik suleqateqarnitta aallarteqqinnissaa assorsuaq nuannaarutigivarput. Naak ukioq kingulleq suleqatigiissimanngikkaluarluta siusinnerusukkut kommunalbestyrelsimi qanimut suleqatigiinnitta takutippaa ataatsimoorluta angusaqarluarsinnaanerput. Taamatut suleqatigiinnitta nanginneqarnissaa qilanaarivarput innuttaasullu siunissaat pitsaanerusoq pilersillugu, Justus Hansen, Demokraatit gruppianni siulittaasoq oqarpoq.

Demokraatit borgmesteriusumut Charlotte Ludvigsenimut (IA) tatiginninnginnermik nalunaaruteqartarnerat pissutigalugu Demokraatinut suleqatigiinnissamik isumaqatigiissut siorna apriilimi kipitinneqarpoq.

Partiip taamani borgmesteriusoq novembarimi 2021-mi tunuaqqugaluarpaat.

Charlotte Ludvigsenili maajimi borgmesteritut ukioq taanna tunuarpoq. Maanna Avaaraq Olsen borgmesteriuvoq, taassumalu Demokraatit suleqatigilernissaat qilanaaraa.

-Una nutaamik suleqatigiilerneq assut nuannaarutigivara. Kommunalbestyrelsimi siusinnerusukkut suleqatigiissimanerput patajaatsumik tunngavissiilluarpoq, naallu ukioq ataaseq suleqatigiissimanngikkaluarluta qularutiginngilara suleqatigiilluarnerput ingerlateqqissinnaallutigu. Suleqatigiilerneq una nutartigaq qilanaarivara, innuttaasutsinnullu pitsanngorsaatissanik pilersitsiffigalugu, oqarpoq.

Ullumi tikillugu sumilluunniit sianigisaqanngilagut

Tusagassiorfinnut nalunaarumminni allaapput: Kommunitsinni tamarmi allannguutinik pisoqarfiusumi, kommunittalu innuttaasunik nutaanik nutserfigineqarnerani, suleqatigiissut isumaqarput pisariaqartoq piffissaq ungasinnerusoq isigalugu politikkikkut pilersaarusiortoqarlunilu aaqqissuusseqqittoqartariaqartoq, inuiaqatigiinnut inuussutissarsiortunullu politikkikkut periusissiamik sanasoqartariaqarluni.

Kisianni sooq IA-p Naleraq siuttuni suleqatigerusunnginnera allanneqarsimanngilaq.

Naleqqap kommunalbestyrelsemi ilaasortaatitai aamma pisoqaraluttuarneranik pasitsaassaqarsimanngillat, gruppeformand Ken Madsen KNR-imut oqarpoq.

- Borgmesterimit nal. 13 missaani sianerfigineqarpunga. Siusinnerusukkut susoqalerneranik ilisimasaqanngilanga, oqarpoq.

- Oqaluukkanni sooq taama iliornerlutik oqaatiginngilaa. Ilisimatinneqaannarpunga, taakku (IA-kkut aaqq.) Demokraatit suleqatigileraat, uagut suleqatigiunnaarluta.

- Oqaaseqarpallaarsinnaanngilanga. Ukiut aappaata qeqqata matuma siornagut partiit pingasuulluta suleqatigiippugut, kisianni Demokraatit, IA-p tatigiunnaarmagit anisitaapput. Tatigeqqilersimassavaat.

Kommunalbestyrelsemi inissat 19-iupput. IA-meersut arfineq-pingasuupput, Demokraatimeersut marluullutik.

Naleqqakkut marluupput.