Demokraatit: Kanngunartumik qinnuuloornerussaaq

Inuit Ataqatigiit Demokraatillu Namminersorneq pillugu isumaqatigiissutip allanngortinniarnissaa pillugu isumaqatigiinngilluinnarput.
Allattoq Noah Mølgaard
septembarip 06-at 2011 11:24

Inuit Ataqatigiit piumasariniarpaat Namminersorneq pillugu isumaqatigiissutip nutarternissaa pingaartumik Naalagaaffiup tapiissutaasa amerlassusilertarnerat qimerloorniarlugu. Demokraatilli isumaqarput kanngunaannassasoq Namminersorneq pillugu isumaqatigiissut allanngortinniarneqassappat.

Naalagaaffiup tapiissutaasa amerlassusilertarnerat Inuit Ataqatigiit qimerlooqqikkusuppaat. Naalagaaffiup tapiissutai aalajangersarneqareernikuupput taamaattorli aningaasat naleerukkiartornerat malillugu allanngortarlutik. Danmarkimi aningaasat naleerukkiartornerat malinneqarpoq. IA-kkulli piumasariniarpaat Kalaallit Nunaanni aningaasat naleerukkiartornerat malinneqassasoq.

- Maannakkutut aaqqissoqarsimanera pissutigalugu Kalaallit Nunaata ukiumut 50-60 millioner koruunit annaasarpai. Taamaattumik suliassatta siulliit ilaattut aalajangiupparput tapiissutit amerlassusilertarnerisa misissoqqinnissaa,Johan Lund Olsen Inuit Ataqatigiit KNRimi apeqqarissaarfigineqarneranni ataasinngornermi unnukkut taama oqarpoq.

Tamannali Demokraatit peqataaffiginianngilaat isumaqaramik tamanna kanngunartumik qinnuuloornerussasoq.

- Namminersorneq pillugu 25. november 2008 taasisoqarmat kalaallit sisamaagaangata pingasut isumaqatigiissut angerpaat. Allatut eqqarsalissagaanni ajoqutaaginnassaaq minnerunngitsumik Naalagaaffeqatigiit akornanni  tatiginassuserput immitsinnullu upperinerput innarlerneqassammat, Demokraatit sinnerlugit Folketingimut qinigassanngortittoq Michael Rosing oqarpoq.

Taassuma kanngunarnerarpaa Danmarkimut isumaqatigiissutigineqarsimasoq malinniarnagu aalajangertoqassappat. Taanna tupigusuppoq Namminersorneq pillugu isumaqatigiissutip akuerineqarnissaanik IA ilungersuuteqartoq maanna ukiut marluk qaangiuttut allanngortitsinissami oqalulermat.