Demokraatit isumaqarput IA uukapaatitaasoq

Partiit Naalakkersuisoqatigiit akornanni aaqqiangiinngiissuteqartoqarpoq. Greenpeacekkut pullasiarsuannit Inuit Ataqatigiit pisaritissimasut Demokraatit Inatsisartunut ilaasortaatitaat, Andreas Uldum isumaqarpoq.

Andreas Uldumip toqqaannartumik assuaraa IA-meersoq Naaja Nathanielsen, taassumali assuarineqarnini akerlilerlugu oqarpoq, Andreas Uldumip pisut iluamik paasisaqarfiginagit assuarinnittoq.

- Demokraatit pakatsissutigaat politikerit Inuit Ataqatigiinneersut nuimasut arlallit Greenpeacemit uukapaatinneqarujussuarmata. Pinerluttuliortarneq imminut akilersinnaanngisaannartussaavoq, pisumili uani Greenpeace pinerluttuliorneq aqqutigalugu politikerinut partiimiit Naalakkersuisoqartitsisumeersunut isummaminik anngussinissaminnik iluatsitsivoq. Tamanna akuerineqarsinnaanngilaq, tusagassiutinut nassiussami Demokraatineersoq Andreas Uldum ilaatigut  allappoq.

Andreas Uldum-ip aqerluusaq inngigissariarlugu, Inuit Ataqatigiit Inatsisartuni ilaasortaatitai, Naaja Nathanielsen, Olga P. Berthelsen aamma Juliane Henningsen allaaserai. Taamatut iliorneranut pissutaavoq, Naaja Nathanielsenip paragraf 37-i malillugu Naalakkersuisunut apeqqutigimmagit Cairn Energyp uuliamik qillerilernerannut tunngasut.

Tassami Andreas Uldum isumaqarpoq Naaja Nathanielsenip apeqqutai Greenpeacekkullu qanoq iliuuseqarnerat imminnut attuumassuteqartut.

Naaja Nathanielsenilli taamaattoqannginnerarpaa isumaqarpoq:

-  Greenpeacekkut akerliunerminnik takutitsinerannut isumaqataannginneq pissutigalugu uuliamik ujarlerneq pillugu oqallinneq unittariaqartoq oqassalluni isumaqarpunga tupinnartuusoq. Uanga taama isumaqanngilanga.

Naalakkersuisunut apeqqutit nassiunneqarput Greenpeacekkut qanoq iliuuseqarnerisa kinguninngua, tassalu tamanna Andreas Uldumip maluginiagaa. Naaja Nathanielsen apeqqutigaarput tamanna tupigineqartariaqarnersoq?

- Tamanna nalaatsornerinnaavoq. Greenpeacekkut tusarniaanerisa akissutaat atuareerlugit, DMU-llu paasisai tunngavilersuutaallu atuarlugit iserfigilluareerakkit aammalu inuiaqatigiit maani Nunatsinni nunanilu allani oqallinneri malinnaaffigereerakkit, paragraf 37 malillugu aatsaat apeqqutit apeqqutigaakkaa. Apeqqutima Naalakkersuisunut nassiuneri aammalu oqallinnerup aallartinnera nalaatsornerinnaavoq, Naaja Nathanielsen akivoq.

Greenpeacekkut akerliunerminnik takutitsinerat pissutigalugu Naaja Nathanielsen allassimanersoq aamma Andreas Uldumip tamanna ilisimaneraa aperaarput, taannalu ima akivoq:

- Erseqqissaatigissavara Naaja Nathanielsen salluliornerarlugu oqarnaviannginnama. Kisiannili una oqaatigissavara, Greenpeace pinerlunneq tunngavigalugu oqallitsitsiniarnera unga akuersaarsinnaannginnakku, Andreas Uldum akivoq, naqissuserluguli oqallinneq aatsaat aallartimmat Greenpeacekkut qanoq iliuuseqarnerisa kingorna, tassalu tamannarpiaq Andreas Uldumip nuannarinngisaa.

Apeqqutilli isornartorsiorpaluttumik nipillit Naaja Nathanielsenip Naalakkersuisunut apeqqutigisaasa qanoq imartutigineri Andreas Uldumip iluamik akisinnaannginnerarpai, taamaattumillu aperaara Naaja Nathanielsenip apeqqutai qanoq piviusorsiorpalaartiginersut, Andreas Uldumilu ima akivoq:

- Soorunami piviusorsiorpasittumik apeqquteqarpoq.

Kinguninnguali Andreas Uldum ima oqarpoq:

- Naalakkersusiut aammalu Råstofdirektoratip suliaminnik iluamik ingerlatsinerat tatigilluinnarparput, taamaattumik Greenpeacekkut pinerlullutik oqallitsitsiniarnerannut peqataassalluta tunngavissaqanngilagut, Andreas Uldum oqarpoq, nangillunilu oqarluni nammineq isumaqarami apeqqutit taakku apeqqutigissallugit pisariaqarsimanngikkaluartoq. Kisiannili ilanngullugu oqaatigalugu apeqqutit ilaat pingaaruteqartuusut, oqallinnerlu innuttaasunit aallartinneqartariaqarsimasoq oqaatigalugu, Greenpeacekkut qanoq iliuuseqarnerat utaqqiinnarnagu.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat