Assi: Simon Uldum

PITUFFIK Danskit politikeriisa USA-p isumaqatigiinniarfigeqqinneqarnissaa piumasarigaat

Pituffimmi sakkutooqarfimmi kiffartuussinissamik isumaqatigiissutip naammagittaalliutigineqarnerata USA-mit aalajangiiffigineqarnera, nunatsinni politikerit akornanni taamaallaat naammaginartinneqanngilaq.

Danskimmi politikeriisa aalajangiineq aamma isornartorsiorpaat USA-mullu isumaqatigiinniaqqinnissamik piumasaqarlutik.
 
Pituffimmi sakkutooqarfimmi kiffartuussinissamik isumaqatigiissutip naammagittaalliutigineqarnerata amerikami oqartussaasunit itigartinneqarnera, Christiansborgimi politikerit assigiimmik isornartorsiorpaat.

AAMMA ATUARUK Pituffik pillugu killiffik ilungersunartutut Naalakkersuisut isigaat

Aviisi Jyllands-Posten naapertorlugu, Enhedslistenip Kalaallit Nunaannut tunngasunut oqaaseqartartuata, Finn Sørensenip, Kalaallit Nunaat Danmarkilu USA-mut isumaqatigiinniaqqittariaqarsorai:
 
- Danskit nunanut allanut tunngasunut ministeriata isumaqatigiissutit amerikamiut Pituffimmi sakkutooqarfimmik atuinerannut toqqammaviusut isumaqatigiinniutigineqaqqinnissaannik piumasaqaateqartariaqarpoq, Finn Sørensen oqarpoq.
 
Taanna SF-imit taperserneqarpoq, aammali Venstre Konservativellu amerikami naalagaaffiup naammagittaalliuteqartarfiata aalajangiinera isornartorsiorpaat. Suliffeqarfik Exelis Services Pituffimmi sakkutooqarfimmi kiffartuussinissamik isumaqatigiissummik tunineqarnera atuuttussatut aalajangiiffigineqarpoq - naak suliffeqarfik amerikamiut suliffeqarfiutaannit aqunneqaraluartoq.

AAMMA ATUARUK Lidegaard: Isumaqatigiinniaqqinnissaq ilimananngilaq

Nunanut allanut tunngasunut ministeriusimasoq, Per Stig Møller, aviisimut Jyllands-Postenimut ima oqarpoq:
 
- Inatsisinut tunngasut amerikamiunut naalakkersuinikkut isumaqatigiissutitta tunngaviinik qajannarsisitsissanngillat, taamaammat nunanut allanut tunngasunut ministerip tamanna qaqittariaqarpaa.
 
Søren Espersenilu Dansk Folkepartiimeersoq ima oqarpoq:
 
- Isumaqatigiinniutigeqqinnissaa ajornakusuussaaq, matumali Kalaallit Nunaata aningaasaqarneranut qanoq pingaaruteqartiginera amerikamiunut paasitinniartariaqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl