VIDEO Pituffik pillugu killiffik ilungersunartutut Naalakkersuisut isigaat
- Siullermik, taamatut aalajangerneq soorunami naalakkersuisut pakatsissutigaat. Aamma taamatut Exelis Servicesip suliassamik imissinneqarneranut nunatta aningaasaqarnera annertuumik eqqorneqarsinnaavoq. Soorunami killiffik ilungersunartutut isigaarput, nunanut allanut tunngasunut naalakkersuisoq, Vittus Qujaukitsoq, KNR-imut taama oqarpoq.
AAMMA ATUARUK Pituffimmi kiffartuussinissamik isumaqatigiissutip annaaneqarnera
Naalakkersuisut danskit naalakkersuisui peqatigalugit USA-mi oqartussat assigiinngitsut suliap ingerlariaqqiffissaanik assigiinngitsunik maanna ujartuipput, aamma oqaloqatigiinnerit sapaatit-akunnerini arlalinni ingerlareersut massakkut qaffasinnerusumi qinikkanut susassaqartunut assigiinngitsunut oqaloqatigiinnerit ingerlanneqartut Vittus Qujaukitsup oqaatigaa, nunatsinnilu naalakkersuisut nammineerlutik USA-mi oqartussanut assigiinngitsunut nunatta oqariartuutaanik ersarissumik apuussifiginissaat tullinnguunnerarlugu.
AAMMA ATUARUK Kalaallit Pituffimmiittut siunissaat nalunartoq
Kalaallit sulisoriinnassallugit neriorsuuteqartut
Exelis Services A/S-imit erseqqissaatigineqarpoq Pituffimmi sulisut sulisoriinnarneqassasut, taamaakkaluartoq nunanut allanut tunngasunut naalakkersuisup, Vittus Qujaukitsup, nunatta sapinngisamik annerpaamik Pituffiup nunatsinnit iluaqutissarsitinnissaa qulakkeerusuppaa.
- Siullermik, Greenland Contractorsimik nunarput piginneqataavoq, tassuunakkullu agguagarsisarnikuulluni Pituffimmi suliassat isumagineqarnerannut. Tamakku saniatigut siammarinnerusumik ajornartorsiutitut tikkuagassaq uaniippoq illersornissamik isumaqatigiissut aallaavigalugu nunatta annerusumik iluaqutissarsinissaa qulakkeerniagassaammat. Taamaattumik una Pituffimmut tunngasortaa soorunami pingaaruteqaraluartoq illersornissamik isumaqatigiissut siammasinnerusumik nunatsinnut annerpaamik iluaqutissanngortinniassallugu suliassartaa Naalakkersuisuniippoq.
Illersornissamik isumaqatigiissut nunatta annerusumik pissarsiaqaatigisariaqaraa
- Naalakkersuisut suliassaq ilungersunartutut aalluppaat, aamma oqariartuuteqarnitsinni periarfissat assigiinngitsut atorlugit apuunneqareernikuupput nunatsinnit soqutigisat sumiinnerat. Sumiginnaanermut oqartoqassappat uaniippoq nunatsinni ukiorpassuarni illersornissamut isumaqatigiissut Pituffimmi annikitsuaraannarmik iluaqutaasarsimavoq, taamaasilluni nunatsinni illersornissamut suliat assigiinngitsorpassuit nunatta tamakkiisumik iluaquteqarfigisarsimanagit. Inuussutissarsiornikkut, ilinniartitaanikkut, angallannikkut, takornariaqarnikkut assigiinngitsorpassuartigullu nunarput suli annerusumik pissarsisariaqarpoq.
AAMMA ATUARUK Naalakkersuisut sinissimapput
Kiffartuussinissamilli isumaqatigiissut qaammatini arlalinni eqqartorneqareerpoq, suliassallu Naalakkersuisunngortunit pinartutut suliarineqarsimannginnera assigiinngitsunik uparuarneqartarluni.
- Suliaq pinartutut suliarineqarpoq, maalaartarfimmiilli suliarineqarnera aamma ataqqisariaqarpoq, tassami maalaartarfiup aalajangiinissanut suliariumannittussarsiuussinermut tunngasut kiisa aalajangiiffigineqarnikuummata. Politikkikkut aningaasarsiornikkullu ajornartorsiutip qiterisai suli tikinneqanngillat, taamaattumik politikkikkut susassaqartunut sapaatit-akunnerini tulliuttuni qaqinneqartussanngorput aatsaat, nunanut allanut tunngasunut naalakkersuisoq, Vittus Qujaukitsoq taama oqarpoq.
