Kalaallit Pituffimmiittut siunissaat nalunartoq

Ullumikkut Exelis Service A/S-ip Pituffimmi kiffartuussinissamik isumaqatigiissut pissarsiarigaa naqissuserneqarpoq. Taannalu isumaqatigiissut ukiunik arfineq marlunnik sivisussuseqarpoq.

Exelisip oqaatiginikuuaa kalaallinik sulisoqarnissaq ilinniartoqarnissarlu pingaartillugu, taamaakkaluartoq kalaallit Pituffimmi suliffeqartut siunissaat nalunartoq pissanngatigineqartorlu SIP-mi siulittaasup, Rosa Guldagerip, oqaatigaa.

- Soorunalimi pissanganarpoq naluarpummi qanoq pisoqarumaarnersoq. Maani sulisut suli ataatsimoortinneqanngillat sulilu erseqqinnerusumik nassuiaanneqaratik, Rosa Guldager KNR-imut oqarpoq nangillunilu;

- Taamatut inissisimalluni sooruna eqqarsarnartoqarpoq. Aalassannanngitsuunngilaq pissanganarlunilu nalullugu qanoq pisoqassanersoq, Rosa Guldager, Kalaallit Pituffimmi suliinnarsinnaanissaannik neriuuteqartoq, oqarpoq.

Ilaasortat amerleriartut

SIP Pituffimmi ataatsimiisitsisimavoq, tamatumalu kingunerisaanik SIP-mut ilaasortat amerleriarsimasut. Kalaallit Pituffimmiittut kitaanut angerlartariaqassagunik ikiorserneqarnissaq pisariaqarteriaannaavaat, taamaammallu SIP-mut ilaasortanngornissaq pingaartissimallunikku.

- Maani suliunnaarutta kitaanullu angerlarluta ingerlaannaq suliffissatsinnik nassaarnavianngilagut, taamaammat SIP-mut ilaasortaanissaq pingaartinneqarpoq, Rosa Guldager nassuiaavoq.

Massakkorpiaq SIP Pituffimmi 19-inik ilaasortoqartoq, sulilu ilaasortanngorniarlutik soqutiginnittoqartoq Rosa Guldager ilisimatitsivoq.