Lidegaard: Isumaqatigiinniaqqinnissaq ilimananngilaq
Exelis Servicep Nunatsinni sullissilernissaa illersornissaq pillugu danskit amerikamiullu isumaqatigiissutaannik uniortitsinerusoq, danskit nunanut allanut tunngasunut ministeriata isumaqafigalugu USA-p nunanut allanut tunngasunut minsiterianut erseqqissarpaa. Isumaqatigiinniaqqinnissarli ilimaginngilaa.
Kalaallit qallunaallu suliffeqarfiutaat Pituffimmi sullissorusuttut tassa ajorsarpat, immaqaluuniit suli ajungaaniartoqarsinnaava?
Taakkua maalaarutaat USA-mi naalakkersuisut ataanni maalaaruteqartarfimmit, US Government Accountability Office-mit, itigartinneqarnerat pillugu danskit nunanut allanut tunngasunut ministeriata, Martin Lidegaardip USA-p nunanut allanut tunngasunut minsiteria John Kerry nalakkersuisuineersullu allat oqaloqatigeqqammerpai.
Martin Lidegaardip amerikamiunut paaseqquvaa, Exelis Servicep Nunatsinniilernissaa illersornissaq pillugu danskit amerikamiullu isumaqatigiissutaannik uniortitsinertut isumaqarfigigamiuk.
Nunanut allanut tunngasunut ministerip naammaginartitsinnginini oqaatigigamiuk ajunngisaarnerujussuarmik akineqarnini tupaallaatigisimallugu KNRimut oqaluttuarpoq.
Kisianni illersornissamik isumaqatigiissutip USA-mut isumaqatigiinniutigineqaqqinniissaanik IA-p siunnersuutaa pisiusorsiortut isiginngilaa.
- Pituffik pillugu isumaqatigiissutip tamakkerlugu isumaqatigiinniutigineqaqqinnissaa takorluungilara. Taamannlli pisoqqinnginniassammat, 2013-imi isumaqatigiissuterput erseqqissassavarput. Isumaga malillugu isumaqatigiissummi tassani immikkut erseqqissarparput, piginneqatigiiffik danskinit kalaallinilluunniit pigineqartoq matuminnga suliarinnittussatut inersuuneqarssasoq.
