URANI Danskit partiivisa saamerliit uranimut isumaqatigiissut isumaqatigiinngissutigaat

Isumaqatigiissut Socialdemokratinit nersualaarneqartoq, Enhedslistenimiit Inuit Ataqatigiit isornartorsiuinerat tapersersorneqarpoq.

- Isumaqatigiissusiortoqarsimanera pitsaalluinnarpoq, tassami uranisiortoqalinnginnerani inissitsiterisoqareerpoq.

Socialdemokratit nunarput pillugu oqaaseqartartuata, Karin Gaardstedip, uranimik isumaqatigiissutip nunarput uranimik tunisassiulernissaanut tunngavilerluaraa isumaqarpoq, tassami Danmarkip nunat tamalaat akornanni uranimik avammut niuernermut piumasaqaatit sakkortunerpaat akuerinikuummagit.

Aamma atuaruk IA-p isornartorsiuinera Qujaukitsup tunngavissaqannginnerarpaa

Taamaattumillu urani kikkunnut tuniniaqqusaanersoq Danmarkip aalajangertassappagu Danmark nunatta uraniutaanut pissaaneqarpallaalissanerarlugu Inuit Ataqatigiit isornartorsiuinerat paasisinnaanngilaa.

- Uanga nammineq paasinninnera malillugu Kalaallit Nunaata akuerinikuusai Danmarkip akuerinikuusaanit annikinnerupput. Imatut paasillugu, Danmarkimut piumasaqaatit Kalaallit Nunaannut piumasaqaatinit sakkortunerupput. Taamaattumillu urani Kalaallit Nunaannit anninneqartoq Danmarkip akisussaaffigissammagu isumaqatigissut ajunngilluinnartuusoq.

- Kalaallinullumi aamma oqiliallannarsimassaaq Danmarkip akisussaaffik tigummagu, Karin Gaardsted KNR-imut oqarpoq.

Alternativet uranisiornissamut akerliupput, isumaqatigiissulli kisiat isigigaanni isumaqatigiissutitsialaanerarlugu, nunarput pillugu oqaaseqartartuat Nikolaj Amstrup oqarpoq:

- Namminersorlutik oqartussat taama aaqqissuussaatillugu isumaqatigiissutit isumaqatigiissutigineqarsimasut atoruminaatsumik allaanerusinnaapput.

Aamma atuaruk Urani pillugu isumaqatigiissut IA-p immikkullu ilisimasallip

Namminersorlutik oqartussaniimmi inatsimmi ersarilluinnartumik allaqqavoq, naalagaaffiup isumannaatsuunissaanik politikki Danmarkip akisussaaffigigaa.

- Naalagaaffiup isumannaatsuunissaanik politikki kisiat isigigaanni aatsitassat qinngornillit ulorianartumik immikkut inissisimapput. Taamaattumillu naalagaaffiup isumannaatsuunissaanik politikki eqqartorneqartillugu avaqqunneqarsinnaanngitsutut isigaakka, Nikolaj Amstrup KNR-imut oqarpoq.

Aamma atuaruk Uranimik avammut nioqquteqarneq Danmarkip akisussaaffigissavaa

Isumaqatigiissutip Kalaallit Nunaata aatsitassanut nammineq akisussaaneranut innarliisutut Inuit Ataqatigiit isornartorsiuinerat Enhedslisteniinnaap paasisinnaagaa, nunarput pillugu oqaaseqartartup Christian Juhlip oqaatigaa:

- Kalaallit Nunaat Danmarkilu qanimut suleqatigiissapput, Danmarkilu oqassappat: Naamik, nunat uku uranimik pisissanngillat, taava akerleriittoqalersinnaasoq takorloorneqarsinnaavoq, Christian Juhl KNR-imut oqarpoq.

SF-imit, Venstremit, De Konservativenit, Radikale Venstreniillu oqaaseqartitsiniaraluaratta iluatsissimanngilagut.