Danskit nunanut allanut ministeriat Nunatsinnut ullumi tikissaaq
Naalakkersuisunik ataatsimeeqateqarnermini, Pituffimmi kiffartuussinissamik isumaqatigiissut sukumiisumik oqaloqatigiissutigissutigineqassasoq, nutaarsiassaqartitsivik Ritzau taama allaaserisaqarpoq.
Pituffimmi kiffartuussinissamik isumaqatigiissut Kalaallit Nunaata aningaasaqarneranut pingaaruteqartorujussuuvoq, Kristian Jensen oqarpoq.
- Amerikamiut sakkutuuvi Pituffimmi mittarfeqarnerat Kalaallit Nunaata aningaasaqarneranut malunnaatilimmik iluaqutaavoq.
- Sivisuumik atuuttussamik aaqqiisoqarnissamik eqqarsartariaqarpugut qulakkeerinnillutalu, taamaaliortoqanngippat tamanna Kalaallit Nunaata aningaasaqarneranut aalajangiisuusinnaavoq, nunanut allanut tunngasunut ministeri oqarpoq.
Silap pissusia pillugu Parisimi isumaqatigiinniarnissat ukiormanna pisussat sioqqullugit Kalaallit Nunaata Danmarkillu suleqatigiinnissaat pingaaruteqarpoq.
Tamanna pillugu, Kristian Jensenip nunanut allanut tunngasunut naalakkersuisoq Vittus Qujaukitsoq qanimut suleqatiginiarpaa.
AAMMA ATUARUK Danmarkimi nunanut allanut tunngasunut ministeri Nunatsinnukalerpoq
Kristian Jensen aamma Vittus Qujaukitsoq Danmark sinnerlugu Alaskami ataatsimiinnermini sapaatit-akunneri arlaqartut qaangiuppata oqalugiassapput.
- Taamaattumik akunnitsinni ajornartorsiutaasinnaasut aporfiillu qaangerneqarnissaat pingaaruteqarpoq, Kristian Jensen oqarpoq.
Nunanut allanut tunngasunut ministerip Kristian Jensenip Nunatsinnut tikeraarnermini nunanut allanut tunngasunut Naalakkersuisoq Vittus Qujaukitsoq aamma aningaasaqarnermut naalakkersuisoq Andreas Uldum kiisalu aalisarnermut nunalerinermullu naalakkersuisoq Karl-Kristian Kruse ataatsimeeqatigissavai.
Kristian Jensen juunimi folketingimut qinersinerup kingorna Lars Løkke Rasmussenimit nunanut allanut tunngasunut ministeritut toqqagaavoq.
Taanna siusinnerusukkut naalakkersuisuni Venstret amerlanerussuteqarfigisaanni ukiuni arfinilinni akileraartarnermut ministerioreerpoq, Venstrellu siulittaasuannut tulliulluni.
