Danmarkimi nunanut allanut tunngasunut ministeri Nunatsinnukalerpoq
Danmarkimi nunanut allanut tunngasunut ministeri Kristian Jensen ataasinngorpat Nuuliassaaq ullunilu marlunni Nunatsinni tikeraassalluni. Nunanut allanut tunngasunut ministeeriaqarfik taama ilisimatitsivoq.
Allattoq Helle Nørrelund Sørensen
aggustip 12-at 2015 11:31
Nutserisoq Elisa Isaksen
Nunanut allanut tunngasunut ministeri Kristian Jensen taamaalilluni ministeritut siullermeerluni Nunatsinni tikeraassaaq.
Ministeri tikeraarnermini ilaatigut nunanut allanut tunngasunut Naalakkersuisumik Vittus Qujaukitsumik ataatsimeeqateqassaaq, ataatsimiinnermilu tassani ilaatigut Pituffiup aamma Issittumi Siunnersuisoqatigiit oqallisigineqarnissaat naatsorsuutigineqarluni.
Kristian Jensenip nunanut allanut tunngasunut ministeritut Martin Lidegaard taarserpaa, taanna Nunatsinnut tikeraallattaartartutut ilisimaneqarpoq.
Nunanut allanut tunngasunut ministerinngortoq Lars Løkkep siornatigut naalakkersuisuutitaanni ukiuni arfineq pingasuni akileraartarnermut ministeriusimavoq.
