Nunanut allanut ministereqarfik: Nunarsuarmi killeqarfiit tassuugu matuneqarataannaapput

Coronavirusip Europap annerpaartaani tuniluukkiartorunnaanngilaq, taamaammat danskit nunanut allanut ministereqarfiat nunanut tamalaanut pisariaqanngisumik marsip qaammataanisulli angalaqqusiunnaassagunarpoq.

Danskit nunanut allanut ministereqarfiata innuttaasunik sullissiviani pisortaq, Erik Brøgger, taama oqarpoq.

- Nunat tamalaat coronavirusimik tunillatsissimasoqarfiunerpaasut killeqarfii tassuugu - immaqa aqagu - marsip ulluisa 13-ianisulli matuneqaqqerataannaasut, Erik Brøgger oqarpoq. Angalanermullu malittarisassanik nutartereqqileruttornerminni taamaaliortoqarataannaasoq ilanngullugu oqaatigaa. 

AAMMA ATUARUK Region Hovedstadenimit Tysklandiliartut mattusimatinnissaat piumasaqaataalertoq

Danskit nunanut allanut ministereqarfia nunanut tamalaanut, Cypern Grækerit Nunaat, Sverigep ilaa aamma Tyskland Norgelu minillugit, pisariaqanngitsumik angalaqqusinngikkallarpoq. Angerlarsimaannarnissamulli piumasaqaatit Tysklandimut Norgemullu tikittunut atuuttarput.

Angalanermut malittarisassat juunimi qasukkarneqartut

Danskit nunanut allanut ministereqarfiata angalanermut malittarisassat sisamanngornikkut nutartertarpai. Coronavirusimik tunillatsissimasut amerliartoqqimmata, Tysklandimut Cypernimullu pisariaqanngitsumik angalasoqaqqusaajunnaarneranik kinguneqartumik angalanermut malittarisassat allanngortittussanngorpasilerpai.

Danmark taamaalilluni marsip ulluisa 13-iani iliuuseriminut assingusumik iliuuseqaqqeratarsinnaavoq, nunanummi tamalaanut pisariaqanngitsumik angalasoqannginnissaa nunanut allanut ministereqarfiup taamani inassutigaa. Angalanermullu malittarisassat aatsaat juunimi qasukkarneqarlutik.

AAMMA ATUARUK Danmarkip angalasut takornariallu amerlanerusut ammaassiffigissagai

Timmisartumilli suli angalasoqarsinnaajumaarmat maanna pissutsit marsimi pissutsinit allaanerujumaartut, Erik Brøgger erseqqissaavoq.

- Timmisartut angallassiinnassapput, timmisartummi tamarluinnangajammik taamanikkut angallassinngimmata massakkut pissutsit marsimi pissutsinit allaanerujussuussapput.

- Tamanna pisarialimmik angalasussanut malunnaataassaaq, taakkuali eqqaassanngikkaanni pissutsit allanngussanngillat, Erik Brøgger oqarpoq.

Danskit oqartussaasuisa, nunamut tassani inuit 100.000-ugaangata sapaatit akunnerata ingerlanerani 30-nik tunillatsissimasoqarfiusartumut, pisariaqanngitsumik angalasoqannginnissaa inassutigaat.

Nunap tassani inuit 100.000-ugaangata sapaatit akunnerata ingerlanerani 20-nit ikinnerusunik tunillatsissimasoqarfiusartup killeqarfii ammaqqinneqarsinnaanngortarput.