Region Hovedstadenimit Tysklandiliartut mattusimatinnissaat piumasaqaataalertoq
Danmarkimi Region Hovedstadenimit Tysklandiliartut sapaatit-akunnerini marlunni mattusimatinnissaat piumasaqaataalerpoq. Danmarkip nunanut allanut ministereqarfia taama nalunaaruteqarpoq.
Coronavirusip Region Hovedstadenimi tuniluutileqqinnera pissutaalluni tassannga angalereernermi sapaatit-akunnerini mattusimatittalernissaq pingasunngornerup unnuaani atuutilerpoq.
AAMMA ATUARUK Nunatsinnukartunut innersuussutit nutaat: Kommunit aappaluttut paatsuunganartut paasikkit
Oktobarilli aallaqqaataata tungaanut angalasut coronavirusimik tunillatsissimannginnermut uppernarsaammik takutitsisinnaagunik mattusimatinnissamut innersuussummit ilaatinneqassanngillat. Coronavirusimut misissortinneq sivisunerpaamik nalunaaquttap akunneri 48-nik pisoqaassuseqassaaq.
Danmarkip sinneranit Tysklandiliartut killilersorneqarsinnaanissaat, Tysklandip nunanut allanut ministereqarfianit aamma eqqarsaatersuutigineqartoq, Flensborg Avis allappoq.
Danmarkimimi nunap immikkoortuini amerlasuuni inuit 100.000-ugaangata 50-it sinnerlugit coronavirusimik sapaatit-akunnerata ataatsip ingerlanerani tunillatsissimammata tamanna eqqarsaatersuutigineqarpoq.