Danskit ministeriat: Kalaallit Nunaat eqqaavissuartut atorneqassanngilaq
![Esben Lunde Larsen](/sites/default/files/styles/image_934x467/public/article_images/e55a7849-60f7-4d47-beb4-29d7ad47a0f5.png?itok=MC-9kWeA)
Danskit avatangiisinut inuussutissalerinermullu ministeriat, Esben Lunde Larsen, Nunatsinni sapaatit-akunneranni uani tikeraartoq taama oqarpoq.
Kviksølvi aatsitassarsiornermeersoq aamma akuutissat fluorit atisaneersut pequtineersullu imaata sarfaanit anorimillu Kalaallit Nunaannut Issittullu sinneranut siaruaanneqartarput.
- Taamaammat nunani issittuni mingutsitsinerujussuaq malinnaaffigivarput, taamaaliornikkut akuutissat suut killilersornissaannut atorunnaariartornissaannullu ilisimasaqalerniassagatta, avatangiisinut ministeri taama oqarpoq.
Nunatsinni avatangiisit pinngortitallu qanoq-innerinik ilisimasaqarnerulernissamut aningaasaliissutigineqartut 24 millionit koruuniusut ilaannik Nunarput pissarseqqammerpoq.
Nunatsinni Savalimmiunilu ilisimatuussutsikkut suliniutit 20-init amerlanerusut aqqutigalugit Issittumi akuutissat toqunartortallit arrortikkuminaatsupilussuit qanoq siaruartigisimanerat paasiniarneqassaaq, akuutissat ajoqusiisinnaasut atorunnaariartornissaannut nunarsuarmi nunat allat kimigiiserfiginiarnissaat siunertaralugu.
Nutaatullu aamma imavissuarni plastikkinik eqqakkat ajornartorsiutaanerat misissuiffigineqassaaq. Plastikkinik eqqakkat timmissat imarmiut timaanni sinerissamilu katersuuttarput.
Esben Lunde avatangiisinut naalakkersuisumit Mala Høy Kúkomit tikeraarsarneqarluni nunatsinniippoq, maannakkorpiarlu Tunumi Ikkatsermiippoq, amerikamiut sakkutooqarfigisimasaanni Bluie East 2-mi qimaannarneqarsimasut alakkarterneqarlutik.