Danskit aningaasaqarnermut ministeriat Folketingimut ilaasortatsinnut assammik isaassisoq
Danmarkimi aningaasanut inatsisissami kalaallinut tunngasut taassuma misissoqqissaarniarpai, Inatsisartunummi qinersineq pissutigalugu aningaasanut inatsit akuersissutigineqartoq Kalaallit Nunaannit annerusumik sunniuteqarfigineqanngimmat.
Doris Jakobsenip aamma Johan Lund Olsenip aningaasaqarnermut ministeri ullumi ataatsimeeqatigaat. Ataatsimiinneq taanna aningaasanut inatsisissap isumaqatigiinniutigineqarnerata nalaani pisussaagaluarpoq.
- IA-p arlaleriarluni erseqqissartuartarsimavaa isumaqatigiinniarnerni peqataatinneqartarnissarput naatsorsuutigigipput, soorlu tamanna ukioq kingulleq aningaasanut inatsisissatut siunnersuut isumaqatigiinniutigineqarmat aamma takugipput. Taamani suliassaqarfiit toqqaannartumik Nunatsinnut attuumassuteqartut pillugit piviusumik isumaqatigiinniarfigineqarpugut, Johan Lund Olsen allappoq.
Danmarkimi aningaasanut inatsisissaq aappaagu atuuttussaq decembarip 17-ianni inaarutaasumik akuersissutigineqannginnerani qanoq iliuuseqarsinnaanerluni misissorniarlugu, Folketingimi ilaasortat taakku marluk Bjarne Corydonip neriorsorpai.
Danmarkimit aningaasaliisoqarsinnaaneranut oqallinnermut atatillugu Corydonip tikkuarpaa, Danmarkimi aningaasaateqarfiit Vækstfond aamma Eksportkreditfonden Kalaallit Nunaanni aningaasalersuinissamut inatsisitigut tapersersorneqarmata taassumalu aningaasaateqarfiit piareersarneqarnissaat qulakkeerniarpaa.