Danskit aningaasaqarnermut inatsisaat nunatsinniit peqataaffigineqanngilaq
IA-miit Siumumiillu piumasaqaatit ukiup tullianut missingersuummut ilaanersut erseqqarlunnerat tamassumap kinguneraa - tamannalu ajorluinnartoq Johan Lund Olsen IA-meersoq isumaqarpoq.
- Pakatsivunga, uagut naalakkersuisunut tunuliaqutaalluta suliarisagut ilaatinneqarnersut ilisimannginnatsigit. Pakatsissutigivarattaaq, ukioq kingullertut aningaasaqarnermut ministeri qanimut oqaloqatiginissaanut periarfissaqarsimannginnatta, taamanimi nalunngilarput suliagut sumut ingerlanneqarnersut, Johan Lund Olsen oqarpoq.
Partii IA-p piumasaqaatigisai qanoq pineqassanersut aningaasaqarnermut ministerimut Bjarne Corydonimut apeqquteqarluni allagaqarpoq.
Johan Lund Olsenip Doris Jakobsenillu Siumumeersup aningaasaqarnermut ministerimik ataatsimeeqatiginninnissaraluat inatsisartunut qinersinissaq nalunaarutigineqarmat ministerimit unitsinneqarpoq. Tassanilu qinersereernerup kingorna isumaqatigiinniarnerit aallartinneqaqqissammata patsisigineqarluni.
Doris Jakobsenili Siumumeersoq imatut ernummateqarani KNR-mut oqaatigaa naatsorsuutigalugulu aningaasanut tunngasuni ministerip neriorsuineratuut partiip piumasaqaatigisai pillugit Inatsisartunut qinersisoqareernerata kingorna ataatsimeeqatigissallugu
Aningaasaqarnermut inatsip pingajussaanneerneqarnissaa decembarip 17-ni folketinngimi taasissutigineqassaaq.
