Dansk Partiip siulittaasua qaratsamigut aanaartoornermi kingorna toquvoq
Danskit politikeriat aamma Det Konservative Folkepartimi siulittaasoq, Søren Pape Poulsen, qaratsamigut aanaartoornermi kingorna 52-inik ukioqarluni toquvoq
Partii Ritzauimut mailikkut oqarasuaatikkullu taama ilisimatitsisimavoq.
Partiip siulersuisuunerisa ippassaq ataatsimiinneranni qaratsamigut aanaartoorsimavoq, Odense Universitetshospitalimut aallarunneqapallassimavoq, kisianni annaanneqarsinnaasimanngilaq, Paartiianiit taama allapput.
Søren Pape Poulsen De Konservativemi 2014-imiilli siulittaasuusimavoq, 2016-imit 2019-imut inatsisinik atortitsinermut ministeriuvoq.
Siulittaasuunini sioqqullugu ilaatigut Viborgimi borgmesteriusimavoq.
Suleqat pitsaalluinnartoq
Inuit attaveqaqatigiittarfiini misiginneqatiginnissutit attortisimanartut politikkerimut toqusumut tunngasut allanneqaqattaarput.
Folketingimut ilaasortaq Aaja Chemnitz Inuit Ataqatigiinneersoq suleqatigisarsimasaalu allattunut ilaavoq:
- Søren Pape Poulsenip toqunera pillugu nutaarsiassaq tusassallugu tupassutigeqaara, naak kikkunnut tamanut ammasumik isumaqatigiittoqartaraluartoq, Søren suleqatitut nuannersuuvoq, ammasuuvoq, suleqat pitsaasoq Søren qungujulajuaannartuuvoq, Aaja Chemnitz allappoq.
- Partiip siulittaasuatut inatsisinillu atortitsinermut ministeritut Kalaallit Nunaat pillugu pitsaasumik pingaarutilinnillu oqallisigisaqartarsimavugut. Iliuuserisimasarnut tamanut qujanaq, maqaasineqassaatit.
Afrika sikuliinnarlugu
Søren Pape Poulsen Danmarkimi ministeriunertut qiningassanngortikkaluarnermini 2022-mi immikkut maluginiarneqaleqqaarpoq.
Tassani paasineqarpoq amerikamiut aallartitaqarfiata ataatsimeeqatiginerani Kalaallit Nunaat "Afrika sikuliinnarlugu"-mik taasimangaa .
Oqaaseqaat utoqqatsissutigaa, kisianni aamma oqaatigaa "Kalaallit Nunaat ineriartortutut oqaatigissallugu taassallugulu annertuallaartoq ."
Tamanna Kalaallit Nunaanni soorunami isornartorsiorneqangaatsiarpoq.
