Dansk Industri: Kalaallit aningaasaateqarfimmut nammineq aamma aningaasaliissapput
Aatsitassalerinermut aningaasaateqarfissamut Kalaallit Nunaat Danmark peqatigalugu aningaasaliisariaqarpoq. Danmarkimi suliffissuit peqatigiiffiat, Dansk Industri, taama isumaqarpoq.
Allattoq Helle Nørrelund Sørensen
septembarip 24-at 2014 05:52
Danskit nunani allamiullu suliffeqarfii suleqatigiinnissamik naatsorsuuteqassappata tamanna pisariaqartoq, Dansk Industri isumaqarpoq.
- Isumaliutit pissanganartut tusaannarlugit isumaqarfigaagut, Dansk Industrimi, ulluinnarni DI-mik naalisarneqartartumi siunnersortaaneq, Peter Bay Kirkegaard, oqarpoq.
Taanna aamma Issittumi Siunnersuisoqatigiinni issittumi aningaasarsiorneq pillugu siunnersuisoqatigiinni ilaasortaavoq. Nunatsinni aatsitassarsiorfinnik aallarnisaanermik suliaqartussamik danskit naalagaaffiata tapersersugaanik aningaasaateqarfiliortoqassasoq siunnersuutaavoq.
Kisianni Nunarput nammineq aningaasaateqarfimmut aningaasaliisariaqartoq, DI-mi isumaqarput.
- Aningaasaateqarfimmik isumaliuteqarnerup inerisaqqinneqarnerani pingaaruteqartussatut isigisatta ilagaat, kalaallit assersuutigalugu aningaasaleeqataanikkut qanoq peqataalersinneqarsinnaanersut eqqarsaatigineqartariaqartoq.
Taamaaliornikkut inuussutissarsiutinik ataavartumik ineriartortitsinermut kalaallit akuunerat, piginneqatigiiffinnut Kalaallit Nunaanni aningaasaleerusuttunut takutinneqarsinnaavoq, Peter Bay Kirkegaard oqarpoq.
Danskit kalaallillu piginneqatigiiffii 30-it 40-illu akornanniittut aatsitassarsiornerni suliassanik tigusinissamut massakkut piareersimasut, DI naliliivoq.
Naallu assersuutigalugu aatsitassarsiorfimmik aallartitsinissani piginneqatigiiffinnik nunani tamalaaneersunik suli pisariaqartitsisoqassagaluartoq, aningaasaateqarfik naalagaaffimmit aningaasalersorneqartoq pingaaruteqassaaq.
- Aningaasaateqarfik taamaattoq kisimiissinnaanavianngilaq, kisianni aningaasaliisussanut nunani tamalaaneersunut ilisimatitsissutaassaaq, Kalaallit Nunaanni inuussutissarsiutinik ineriartortitsinissamut danskit kalaallillu piumassuseqarmata, DI-mi siunnersortaaneq Peter Bay Kirkegaard oqarpoq.
Kisianni Namminersorlutik Oqartussat danskillu naalagaaffiat tamarmik immikkut aningaasaliisarfittut aningaasaateqarfiulerumaartumut qassinik aningaasaliisariaqarnersut, taassuma oqaatigerusunngilaa.
