Dansk Folkeparti: Issittup sammineqarnerunissaa nuannaarutissaavoq
Taksøe-rapportimik taallugu nalunaarusiap saqqummersinneqarnissaanut atatillugu partii Danmarkimi naalakkersuisunik tapersersuisoq Dansk Folkeparti taama qisuariaateqarpoq.
Issittup immikkut ittumik aallunneqarnissaa, Taksøe-rapportimut atatillugu isumalioqatigiissitap siulittaasuata, atorfilittap Peter Taksøe-Jensenip innersuussutigaa.
Taama oqartoqarnera Søren Espersenip, Dansk Folkepartimeersup, nuannaarutigilluinnarpaa:
- Soqutigisat aallaavigalugit nunanut allanut politikkeqalernissamut Taksøep eqqarsaatersuutai nuannaarutissapput. Tassami nunat killiit Danmarkillu soqutigisai pingaarnerutinneqartariaqartut isumaqartuarnikuugama, Søren Espersen nutaarsiassaqartitsivimmut Ritzauimut taama oqarpoq.
Aamma atuaruk Atorfilittaq: Issittoq Danmarkip nunanut allanut tunngasunut politikkianut ilaatinneqarnerusariaqarpoq
Danmarkip Issittumik pingaarnerutitsilluni aallussaqarnissaanut innersuussutit, SF-ip siornatigut siulittaasorisimasaata, nunanullu allanut tunngasunut aamma ministeriusimasup, Holger k. Nielsenip, tapersersorpai.
Danmarkilli nunani allani ilaatigut ungasissuni suliniuteqarnerata unitsivinneqarnissaanut oqartoqarnera, Holger K. Nielsenip orniginartinngilaa:
- Issittoq pingaarnerutittariaqaripput ilumoorpoq, tamannami siunissami pingaaruteqalersussaammat. Nunanili qaninnerusuni soqutigisavut nunanilu ungasissuni kiattuni soqutigisavut aporaatsinneqartariaqanngillat. Sorsukkumatuutut isikkoqarluta nunanut allanut tunngasunut ukiuni kingullerni 20-ni politikkimit sorsukkumatuujunngitsutut isikkoqalernissarput pingaaruteqarpoq, Holger K. Nielsen Ritzauimut oqarpoq.
Partii Enhedslisten aamma isumaqarpoq Israelip Palæstinamiullu akornanni aaqqiissuteqartoqarnissaanut Danmark ikiuuttariaqartoq.
Danmarkip nunanut allanut tunngasunut politikkia pillugu nalunaarusiortoqarnissaa, Danmarkimi naalakkersuisut namminneq kissaatigisimavaat, nalarunaasiarlu kingunnerpaamik maajimi saqqummersinneqarnissaa naatsorsuutigineqarpoq.
