Danpilot sinneqartuussaguni sullissaminut utertitsiniarpoq
Ilisimasortanut akitsuutip juulip aallaqqaataanit atuutilersinneqarnera takornariaqataatileqatigiiffiit ajuusaarutigaat.
Greenland Pilot Services Naalakkersuisunit takornarialerisuniillu isornartorsiorneqarsimavoq, aningaasarsiornissarli suliffeqarfiup siunertarinngikkaa piginneqatigiiffiup suliffeqarfimmik piginnittup pisortaa oqarpoq.
- Immakkut angallannermi isumannaallisaaneq pitsanngorsarniarlugu Kalaallit Nunaanniippugut. Aningaasarsiorniarluta Kalaallit Nunaanniinngilagut, Gert Frost, suliffeqarfimmi aallarteqqammersumik Greenland Pilot Servicemik piginnittumi naalagaaffimmit pigineqartumi Danpilotimi pisortaq, KNR-imut oqarpoq.
Isertitaqannginnissamik akiitsoqannginnissamillu pilersaarut
Kalaallit Nunaanni ilisimasortaqarnermut akit ukiut pingasuni isertitaqannginnissamik akiitsoqannginnissamillu pilersaaruteqarnermit isummiunneqarsimasut, nassuiaatigaa.
Akilli nutaat takornariartaatinik nunatsinnukarnissaannut pileriunnaartitsisinnaapput.
Aamma atuaruk Umiarsuaatileqatigiiffiit aningaasartuutinit artukkerneqarput
Akinik qanoq aalajangiisoqarsimanera Blue Water Grønlandip nunatsinni pisortaata Jesper Ørakerip qularutiginngilaa.
- Akitsuutinik appaaneq Danpilotip misissorpaa, kingornalu aningaasartuutit matussuserniarlugit akit aalajangerlugit, Jesper Øraker KNR-imut oqarpoq.
Akit tupigusutsitsipput
Danpilotimut aningaasaliinerusoq ersarissarpaa, isumaqarporli aningaasaliineq nalikillilerneqapallassasoq. Akillu tupigusutsitsipput.
- Imaassinnaavoq ukioq siulleq isertitsissutiginavianngikkaat, ilimagilluinnarparali ukiuni tullerni isertitsissutigilluassagaat. Umiarsuimmi ulluni arfinilinni marlunnik ilisimasortaqarneri 750.000 koruuneqarnavianngilaq. Ilisimasortaq sapaatip akunneranut 300.000 koruuninik akissarsiaqanngimmat, Jesper Øraker oqarpoq.
Aamma atuaruk Takornariartaatit akiliinerusalissapput
Suliffeqarfik Greenland Pilot Services naalagaaffimmit pigineqarmat aningaasarsiornissamik siunertaqanngitsoq Gert Frost Danpilotimeersoq oqarpoq.
Taamaattumillu akit akisuallaassappata aningaasat utertinneqarumaarput.
- Aningaasanik sinneqartuussagutta soorunami sullitatsinnut, tassa takornariartaatinut, akit apparnerisigut imaluunniit akikillilerutitigut aningaasat utertissavagut, Gert Frost oqarpoq.
Tutsuiginassuseq innarlernerusinnaavoq
Umiarsuaatileqatigiiffiilli ukioq manna Nunatsinnukarunik akiliisariaqassapput. Tamannalu annernartoq Jesper Øraker oqarpoq.
Umiarsuit kaaviiaartitaat ilungersunarput ilaasumullu ataatsimut iluanaarut annikippoq, taamaattumik umiarsuaq ilisimasortaqarniarluni millionimik affaanilluunniit akiliissappat aningaasaqarneranut akornutaassaaq.
- Umiarsuit amerlasuut ukioq manna isertitaqanngitsuunngikkunik aningaasartuutaat matussuseqqatassapput. Amerlasuullu angalanissaraluatik taamaatiinnassavaat, tassami imminut akilersinnaanavianngimmat, Jesper Øraker oqarpoq, nangillunilu:
- Kalaallit Nunaata tikitassatut tutsuiginassusaa innarlerneqassaaq. Kalaallit Nunaat tutsuiginarpallaanngereerpoq, taamaattumik ima pisoqarnera iluaqutaanngilluinnarpoq.
