Danmarkip saassunneqarnissaa Al-Qaedakkut kaammattuutigigaat
Sverigep Danmarkillu saassunneqarnissaannut kaammattuut, islamisiortut peqqarniisarniat Al-Qaedakkut tusagassiiviatigut saqqummiunneqarpoq.
TV2 taama allappoq.
Kaammattuut ilisimallugulu qanimut alaatsinaaffigigitsik, politiit isertortumik paasiniaasartui PET-kkut TV2-mut allapput.
Muslimit illernartuutitaannik Koranimik Danmarkimi Sverigemilu ikuallaasarnerit akiniarniarneqarnissaat Al-Qaedakkut kaammattuutigaat.
Muslimit ingasaassiniat pillugit immikkut ilisimasalllip, Tore Refslund Hammingip, oqarnera naapertorlugu muslimit pisussaatitaapput saassussiumatuunik namminneq saassussissallutik.
Al-Qaedap kaammattuutaa quppernernik pingasunik takitigivoq. Koranillu Danmarkimi Sverigemilu ikuallanneqartarnera taakkunannga quppernerni marlunni immikkut sammineqartoq, taassuma oqaatigaa.
Danmarkimi Sverigemilu innuttaasut aaqqissuussamik pilersaarusiorluakkamillu saassunneqarnissaat Al-Qaedap kaammattuutigaa, taanna oqarpoq.
Sverigep Danmarkillu atorfilittaannik toqutsisoqarnissaanut aallartitaqarfiinillu saassussisoqarnissaanut kaammattuuteqartoqarnera PET-kkut ilisimagaat, aviisi Ekstra Bladet ataasinngornermi allappoq.
Ekstra Bladip allaaserisaa naapertorlgu Al-Qaeda taama kaammattuuteqarluni allappoq, paasissutissalli taakku PET-kkunnit suli uppernarsarneqarsimanngillat.