Danmarkimi timmisartoqarfiit ilaasa nittartagaat iserfigineqarsinnaanngikkallartut
Københavnimi timmisartoqarfiup nittartagaa ullumi pingasunngornermi ullaap tungaani ajornartorsiuteqarpoq.
Inuit ilaat nittartakkamut isersinnaasut allat iserniarneq ajornartissinnaavaat.
Københavns Lufthavnimit tusagassiisartoq Juie Boll taama oqarpoq.
Angalaniaraanni timmisartoqarfiup App-ia atorneqarsinnaassaaq, angalanissamut paasissutissat tassuunatigut pissarsiarineqarsinnaassallutik.
Timmisartoqarfiup tusagassiisarfiata ajornartorsiut paasiniaaffigileruttorpaa, paasisaqarnerusoqalerpallu tusagassiisoqarumaartoq nalunaarutigineqarpoq.
Jyllandimi Midtjyllands Lufthavnip, Sjællandimilu Roskilde Lufthavnip nittartagaat aamma iserfigineqarsinnaanngikkallarput.
Imminut Anonymous Sudanimik taaguusersortup inuit attaveqaqatigiittarfianni Redditimi quppernerani asseq takuneqarsinnaavoq. Inuk natsisaartoq quppernillip assingani takuneqarsinnaavoq, pyramidit saavanni assinga takuneqarsinnaalluni.
Asseq Redditimut ikkunneqarsimavoq allattoqarlunilu:
- Nuna aqagu saassutarerusutarput tassaavoq: Danmark. Koranimik ikuallaasarnerit pissutaapput.
- Inuit sussuseqanngitsut Danmarkimi aqagu eqqorneqarumaartut utoqqatserfigaavut. Neriuppugut naammagittarlusi utaqqisinnaassasusi, allassimavoq.
Sverigemi tv-qarfiup DR-itut ittup, SVT-p, nittartagaa februaarip 14-iani saassunneqarmat ateq assingusoq aamma atorneqarpoq.
Koranimik ikuallaasarnerup kingunerisaanik saassussisoqarniartoq Anonymous Sudanip aamma sioorasaarutigaa.