Muslimit 1000-likkaat koranip ikuallanneqarnera kamaatigigaat
Maanna Pakistanimi, Irakimi, Iranimi, Bangladeshimi aammalu Afghanistanimi inuit 1000-likkaarpassuit akerliussutsimik takutitsipput, tamatumunngalu pissutaavoq danskisut svenskisullu innuttaassusillip Rasmus Paludanip muslimit illernartuutitut atuagaat koraani Tyrkiamiut Sverigellu aallartitaqarfiata silataani ikuallammagu
Taama nutaarsiassaqartitsivik AFP aamma Reuters nalunaarput.
Pakistanimi muslimerpassuit illernartuutitut atuagaataata koraanip mitaatiginnittumik pillugu ikuallanneqarnera muslimerpassuarnik aalassassutigineqaqaaq.
Ullunilu makkunani minnerpaamik inuit 5000-t Pakistanip illoqarfiisa pingaarnersaata tulliani Lahoremi akerliussutsimik takutitsileruttorput.
- Korani uummatitsinni naqitaavoq, akerliusut ilaatigut taama nilliapput.
Rasmus Paludanimmi muslimit illernartuutitut atuagaat koraani Tyrkiamiut Sverigellu aallartitaqarfiata silataani arfininngormat ikuallappaa. Taassumalu taama pinera Tyrkiep præsidentiata Recep Tayyip Erdoganip assorsuaq kamaatigaa.
Københavnimi ikuallaaneq
Paludanip aammaarluni Københavnimi tyrkiamiut ambassadeata silataani koran ikuallaqqippaa, taamaalillunilu Danmarki nunanit muslimeqarfiusunit isiginerlunneqartussanngortillugu, soorluttaaq taamani 2006-mi danskip quiassuaatiginnilluni titartaasartup muslimit ataqqilluinnarlugu guutiat Muhammed titartarmagu muslimit akornanni aalassattoqarsimaqisoq.
Maannalu tassa Tyrkiami naalakkersuisut danskit naalakkersuisuinut pisumut akerliullutik tutsiupput.
Afghanistanimiit oqaaseqartartoq oqaluttuarpoq Afghanistanip guvernøria oqarsimasoq, muslimerpassuit 1000-likkaat qinoqatigeereernerup kingorna katersuussimasut kamannertillu ersersikkaat.
- Taakku nilliapput Sverige, USA aammalu FN toqunneqassapput, oqaaseqartitaq taama oqaluttuarsimavoq.
Irakimittaaq akerliussutsimik takutitsisorpassuaqartoq, AFP allappoq.
Indoniasiamiuttaaq nunaminni muslimeqarfioqisut svenskinut qinnuiginnissimapput svenskit aallartitaqarfianni nunanut allanut ministeeriaqarfimmi ataatsimeeqatiserinnikkumallutik.
Taamatuttaaq Egyptenimi upperisarsiornermi qullersaqarfiup nunarsuarmi nunat muslimeqarfiusut tamaasa kajumissaarpaat svenskit nioqqutissaannik pisiumajunnaaqqullugit.
Taamani 2006-mi aviisip ullaakkut saqqummersartup Jylland-Postenip quiassuaatiginnilluni Muhammedimik titartakkat saqqummiummagit, muslimit akornanni akerliussutsimik takutitsinersuaqallarmat danskit nioqqutissaataat aamma kangia qiterlermiut akornanni pisiariumajunnaarneqarput, taamanilu Danmarkip aningaasat 2 milliartit tungaanut annaagai Århusimi niuernermik ilinniarfik taamani inerniliivoq.
