Danmarkip nunami uuliamik gassimillu ujarlerneq unitsikkaa
Nordsømi uuliasiorneq maanna ingerlanneqartoq kisiat ingerlaannassasoq, Danmarkimi Nukissiuuteqarnermut, Pilersuinermut Silallu pissusianut ministereqarfik taama ilisimatitsivoq.
Ingerlatseqatigiiffiit nunami sinerissallu imartaanni uuliamik gassimik ujarlernissamut akuersissummik pissarnissamut periarfissaqartillugit 1997-imiilli politikkeqarneq Danmarkip taamaalilluni taamaatippaa.
Akuersissutilli tunniunneqarsimasut tamarmik ullumikkut utertinneqarsimapput, imminut akilersinnaasumik tunisassiornissamut uuliamik gassimillu nassaartoqarsinnaasimanngimmat.
Ujarlernerullu unitsinneqarnissaanik aalajangerneq Danmarkip silap pissusia pillugu politikkianut atatillugu pisoq, danskit nukissiuuteqarnermut, pilersuinermut silallu pissusianut ministeriat Lars Chr. Lilleholt tusagassiorfinnut nalunaaruteqarluni taama allappoq.
- Danmarkimi uuliamik gassimillu ujarlernerit qillernerillu suulluunniit siunissami Nordsømi ingerlanneqassapput, tassanimi naalagaaffiup innuttaasut pitsaasunik atugassaqartinnissaannik qulakkeerinninnisaannut iluaqutaasussamik suli annertuumik periarfissaqarpoq, aamma tamatumuuna aningaasat isertitarineqartut Danmarkip mingutsitsinngitsunik atuilernissamik anguniagaqarnerata iluatsinnissaanut pingaaruteqarput.
Hollandimiut ingerlatseqatigiiffiat Lolland-Falsterimi uuliamik gassimillu ujarlernissamut maannakkorpiaq soqutiginnittutuaavoq. Danskillu naalakkersuisuisa aalajangernerisigut ingerlatseqatigiiffiup qinnuteqaataa itigartinneqartussanngorpoq.
