Spaceport Greenland: Danmarkimi suliffeqarfik qaammataasianik nunatsinni avataarsualiartitsisarfittaarusuttoq
Nunatsinni avataarsualiartitsisarfeqalerataannaavoq.
Kalaallit Nunaannimi avataarsualiartitsisarfittaarsinnaanissartik, Danmarkimi suliffeqarfiup avataarsualiartitsisarfiutillip EuroSpaceportip pisortaata Nicolas Kristoffersenip neriuutigaa.
- Qaammataasianik avataarsualiartitsisalerusuppugut, taanna oqarpoq.
EuroSpaceport Danmarkimi eqqartuussisuserisoqarfiit ilaat Elmann soorlu rakettinik igeriussisarfiusinnaasumik nunatsinni avataarsualiartitsisarfittaarnissamik misissuinissaminnut Kommune Kujallermit akuerineqaqqammerput.
Eqqartuussissuserisoq Henrik Græsdal taamaaliornissamik isumassarsisuuvoq. Nunarput angimmat avataarsualiartitsisarfittaassaqqittoq, taassuma inatsisilerinermik nunatsinni ukiorpaalunni suliaqartarnermini maluginialersimavaa.
- Kalaallit Nunaat nalunngilluaraanni qanoq angitigisoq arajutsisassaanngilaq. Aamma soorlu aatsitassanik piiaaffiunikut eqqaaniittuinik pinartoqartillugu ajoqusiinani rakettit motooriinik aallartitsinermik misileraaffissaqqitsigisut. Danmarkimi taamaaliorfissaqqinngilaq, taanna oqarpoq.
Kalaallit Nunaat rakettinik igeriussisarfiusinnaasumik aamma avataarsualiartitsisarfissaqqittoq, eqqartuussissuserisoq aamma oqarpoq.
- Akornusiinanimi kujammut imaq qulaallugu igeriussisoqarsinnaavoq. Aamma eqquinani sermersuaq qulaallugu igeriussisarfissaqqittoqarunavippoq. Taamaammat Kalaallit Nunaata inissisimanera eqqaagaanni avataarsualiartitsisarfittaassaqqivippoq.
Piffissatsialaasoq
Kalaallit Nunaalli avataarsualiartitsisarfittaassaqqiinnarnani taamaattumik pilersitsiffiunissaa aamma piffissatsialaavoq. Taamaaliulersaarfiginissaanummi maannakkorpiaq piffissatsialaasoq, Henrik Græsdal isumaqarpoq.
Kalaallit Nunaannimi pissutsit taamaaliorsinnaatitsisut arlaliupput.
- Nunarsuup sinneranut toqqaannartumik aallarfiusinnaasunik pingasunik mittarfissuaqalertussaanera taamaaliorsinnaatitsisunut ilaapput. Kisiannili issaasannerusalerluni sikoqannginnerusalerpoq, assersuutigalugulu KommuneKreditikkut Kalaallit Nunaanni aamma aningaasanik attartoruminarnerulerluni, taanna oqarpoq.
Europamiillu avataarsualiartitsisinnaanissamik soqutiginnittut aamma amerliartortut, Nicolas Kristoffersen EuroSpaceportimeersoq oqarpoq.
- Amerikamiut, russit, kinamiut, japanimiut indiamiullu rakettii atorlugit qaammataasianik ullutsinni avataarsualiartitsisoqakkajuppoq. Europa rakettiliortartunut akuunngingajappoq. Taamaammat Europami suliffeqarfiit rakettinik ineriartortitsinermik suliniuteqartut arlaqarput.
Tamatumunngalu atatillugu rakettinik igeriussinermik misileraaffissaqqittussaalatsisoqartoq, taanna oqarpoq.
- Rakettinik igeriussinermik misileraaffissaliorfissaqqittutut isigaarput. Imaluunniit rakettit motooriinik aallartitsinermik misileraaffiusinnaasumik rakettinillu igeriussiffiusinnaasumik avataarsualiartitsisarfittaassaqqissoraarput.
Nunaqavissunut suliffissaqartitsisussaassasoq
Kalaallit Nunaanni avataarsualiartitsisarfeqalerpat inuussutissarsiornermik inerisaaqataassutaasussaassasoq nunaqavissunullu suliffissaqartitsissutaasussaassasoq, eqqartuussissuserisoq Henrik Græsdal oqarpoq.
- Imaanngilaq ilinniagartuuinnarnik soorlu avataarsualiartitsisarfimmi ingeniøritut ilinniarsimasuinnarnik sulisoqassasugut. Allamik inuussutissarsiutillit assigiinngitsorpaaluit tassani aamma sulisinnaasussaassapput, taanna oqarpoq.
Sanaartornermik kiffartuussinermillu sulialinnut suliffissaqartitsissangallutik, taanna oqarpoq.
Nunaqavissunut naleqquttunik aamma suliassaqartitsissangallutik, taanna aamma oqarpoq. Assersuutigalugu rakettit igeriussimasamik aseqqukuinik atoqqitassanik assartuisitsisartussaassapput.
- Kalaallit Nunaanni piniartorpassuit umiatsiaminnik sinersornermik misilittagaqartulittortaat rakettit aseqqukuinik ungasissukkoorlutik assartuisinnaasortaqarput, taanna oqarpoq nangillunilu:
- Sermersuakkut angallannermik aamma misilittagaqartulittortaqarput. Taakkua qamuteralannermik katersuinermillu misilittagaqarput. Taamaammat Kalaallit Nunaat avataarsualiartitsisarfittaarfissatut periarfissarpassuaqarpoq.
Alloriarneq siulleq
Anguniagarissaaraluaqisulli rakettit motoorinik nunatsinni aallartitseqqaarnissamut piffissaq suli ungasippoq.
Eqqartuussissuserisoqarfiulli Elmannip taamaaliulersaarnertik inatsisitigut tunngavissaqarnersoq misissoqqaassavaa, tamannalu pillugu Kommune Kujallerup kommunalbestyrelsianut allagaqaateqaqqaassalluni.
- Allagaqaaterput maajip naanerani piariissangatipparput, taannalu kommunilu oqaloqatigiissutigissavarput. Taamaalioreeruttalu suliniummi tassani peqataasunut tamanut tusarniaassutigineqassaaq, Henrik Græsdal oqarpoq.
Avataarsualiartitsisarfimmik pilersitsiniarnerup rakettinillu igeriussiniarnerup qanoq sunniuteqarsinnaanerannik misissuinissartik soorunami aamma pingaartikkitsik, Nicolas Kristoffersen oqarpoq.
- Nipitusarsinnaanissaa soorunami sillimaffigaarput. Avatangiisinut sunniutaasinnaasunik assersuutigalugu ikummatissamut aamma batteriinut atortunullu atornikunut tunngasunik naliliissaagut. Minnerunngitsumillu assersuutigalugu qaartoornermi rakettilluunniit aseqqukuinik nakkaasoornermi sillimaffissanut tunngasunik.
Taamaattoqarataannaanissaanullu sillimanissartik soorunami pingaartikkitsik, taanna erseqqissavoq. Tamannarpiarlu pissutigalugu rakettinik igeriussineq tunngaviatigut isumannaalluinnartutut oqaatigisinnaagitsik, Nicolas Kristoffersen isumaqarpoq.
- Nakkarataannaasinnaasugut nalunngikkaluarlugu timmisartumut ilaalluta angalasartugut eqqaamasariaqarpoq. Aporterataannaagaluarluta aqqusinermi ikaartarpugut. Ullutsinnilu atortorissaarutit nutaaliat allat atorlugit sumilluunniit suliaqartilluta ajutoorataannaanissatsinninngarnit ulorianannginnerusoq qularinngilara, taanna oqarpoq.
