Aasarpoq, aput aassimalerpoq aamma ilummukaasut asiartullu imaaginnalerput. Taamaalineranilu ajutoortoqakkajuppoq.

Aasaanerani nunakkut pisuttut imaaginnaleraangamik ajutoortoqakkajuttoq, politikommissæri Carl Sværd oqarpoq:

- Aamma Kangerlussuup Sisimiullu akornanni Arctic Circle Trailikkoorlutik aasaanerani pisuttut imaaginnavileraangamik ikiugasuartariaqalersartunik ajutoortoqakkajuppoq, taanna oqarpoq.

Aamma politiit annaassiniartartullu umiatsiarlutik angalaartunik ajornartoortunik aasaanerani ulapputigisarpaat.

- Umiatsiarlutik angalaartut ajoraluartumik ajornartoortoqakkajupput. Soorlu qasoqqagaluarlutik avalassimasuusinnaasarput, Carl Sværd oqarpoq.

Ujaasinerit annaassiniarnerillu taavalu ajunaartut maqaasineqartutullu nalunaarutigineqartut amerlassusaat ukiut tamaasa allanngorartut, politikommissærip erseqqissaatigaa.

Inuit 122-t nunatsinni 2023-mi annaanneqarsimasut, Kalaallit Nunaanni Imaatigut Timmisartukkullu Annaassiniartarneq pillugu nalunaarusiami (opgørelse fra Sø- og flyveredningstjenesten i Grønland, aaqq.)) allaqqavoq.

Kalaallit Nunanni politiit maqaasineqartutut nalunaarutigineqartunik 2023-mi 85-eriarlutik ujaarinnipput. Taakkunannga 60-it imaatigut 25-llu nunami ujaasinerusut, Kalaallit Nunanni politiit ukiumoortumik kisitsisaataanni erserpoq.

Tassa Kalaallit Nunaanni politiit soorlu silassaq paasiniaqqaarnagu imigassartorsimallutilluunniit umiatsiarlutik avalassimasunik annaassiniakkajuttut, Carl Sværd oqarpoq.

- Isumannaallisarluarnatik avalassimasut aamma pissutaaqataasarput, taanna aamma oqarpoq.

Isumannaallisarluarsimannginneq pissutaasartoq

Qaqugukkulluunniit ajornartoortoqartartoq, Carl Sværdip erseqqissaatigaa. Ajornartoornerilli ilaat ukiup ilaannaani pisarput.

Soorlu sikorsuit immami angallaffigiuminaallisitsisartut, qimusserlutik aalisartut piniartullu ajornartoorlutik angerlamut apuutinngitsoortortaqartartut aavarfiullu nalaani nunami ajutoortoqartartoq, taanna oqarpoq.

Tassa ajutoornerit amerlanerpaartaat piareersarluarsimannginnermik isumannaallisarluarsimannginnermillu pissuteqarput.

- Isumannaallisarluarsimannginneq imaatigut angallattunik ujaasikkajunnermut annaassiniakkajunnermullu pissutaaqataavoq. Isumannaallisaatilluunniit angallatillu atortorissaarutaasa qanoq atornissaannik ilisimasakippallaarneq, taanna oqarpoq.

Aamma nunakkut pisuttunik annaassiniakkajullutik tamannalu nunakkut pisuttut ilarpaaluisa ilaquttatik sumunnarnerminnik nalunaarfigisannginnerannik pissuteqakkajuttoq, politikommissærip aamma erseqqissaatigaa.

- Tassalu ilaanni pisariaqanngikkaluartumik ujaasisoqarlunilu annaassiniartoqartarpoq. Soorlu suli pisaqarsimannginnertik pissutigalugu tikiffissaraluami aqaguani aatsaat tikinnissamik nalunaarsimanngitsortaqartarput, Carl Sværd oqarpoq.

Isumannaallisallaqqinnerusariaqarpugut

Isumannaallisarluaqqaarlutik nunatsinni umiatsiamik angalasut, aavariat nunakkulluunniit pisuttut tusarsaaleraluttuinnartut, Carl Sværd isumaqarpoq.

- Isumannaallisarluaqqaartartulli suli ikippallaaqaat, taanna oqarpoq.

Kalaallit Nunaanni politiineersoq Carl Sværd politikommissæriuvoq. Assi © : Grønlands Politi

- Imaatigut angallanniat nunakkulluunniit pisunniat tamavimmik attassuteqaatilisarlutik sumiissusersiuutilisarlutillu aallartarunik pitsaanerpaassaaq. Aallartinnatillu piareersarluaqqaartarunik silasioqqaartarunillu.

Aamma VHF-radiolisartarnissaat oqarasuaammilluunniit qaammataasiamut attavilimmik soorlu Iridiumilisartarnissaat allamilluunniit nutaaliamik atassuteqaatilisartarnissaat pingaaqisoq, Carl Sværd oqarpoq. 

- Ajornartoorunimmi taamaalillutik attaviginneriaannaallutillu ikiugasuarneqarneroriaannaasarput.

Isumannallisarluarsimagaluartulluunniiilli aamma ajornartoorsinnaasartut, taassuma ilanngullugu oqaatigaa. Kisianni:

- Isumannaallisarluarsimasummi navianartorsiuleratarnissamut ungasinnerusarput, taanna oqarpoq.