Isiginnaagassiortut akunnerit 500-it isiginnaagassiorneq assaarsinerlu misigigaat

Ukiumi ataatsimi issittumiinneq akunnerillu 500-it pisuinnarluni qulimiguulimmulluunniit ilaalluni annaassiniartartut suliaqarneranni immiussineq DR-imi isiginnaagassiap ‘De arktiske reddere’-ip sisamanik immikkoortortaqarluni naammassineranik kinguneqarpoq. Isiginnaagassiap piviusuinnik tunngaveqartup pinngortitaq peqqarniittoq angallavillu qaqqaqaqisoq ersersippaa.

Qulimiguulimmulli ilaalluni tamaanik assiliissummit isiginninneq qanoq ippa?

KNR-ip isiginnaagassiami ‘De arktiske reddere’-imi ilitsersuisoq isiginnaagassiap immikkoortui marluk takutinneqareersullu tamanna pillugu apeqquteqarfigaa.

- Assiliissummit isiginnikkaanni soorlu assersuuteqartutut ittarpoq, taamaalilluni qanillivallaarani, DR-imit isiginnaagassiap piviusuinnik tunngaveqartup issittumi annaassiniartartut immiunneqarneranni ilitsersuisoq, Jesper Ærø oqarpoq.

- Kisianni soorunami ilungersunarluinnartunik pisoqartillugu sunnertinnarpoq, tamanna avaqqunneqarsinnaanngilaq, ilitsersuisoq nunatsinni ujaasinermi annaassiniarnermilu qulimiguulimmut ilaanermini misigisimasani pillugit erseqqissaavoq.

Minutsit tamarmik pingaaruteqartut

Jesper Ærøp assiliitartunilu Anders Agerbop nunatsinni pinngortitarsuup peqqarniissusaa paasisaqarfigaat, tassami pinngortitamiikkaanni mikisuarannguusoqartarpoq, amerlasuutigullu annaassiniartartut aggersarneqaraangamik pissutsit ajornakusoorajuttarlutik.

Isiginnaagassiamik suliaqartut SAR-imik suliaqartut ilisimasassarsiortunik annaassiniarnissamut kalerrinneqarnerat tupinnartorsiffigipallappaat.

Isiginnaagassiamik immiussisut annaassiniarnerpassuit peqataaffigisaata ilamernganit assi. Assi © : Privatfoto Jesper Ærø.

- Ilisimasassarsiortut annaanniarneqarneranni ilaanngilanga, kisianni Andersimiik nalunngilara ilisimasassarsiortut qulimiguulimmut ikineranni qanoq annikilliortigisut, aappaatigulli aamma ilisimasassarsiornerminnik naammassinnikkusunnertik perusunnerpaagaluaraat, inuunerminilli ulorianartorsiornerminni annaanneqarnertik oqiliallaatigaat. Jesper Ærø oqarpoq.

Taamaammat isiginnaagassiamik suliaqartut annaassiniartartutut qulimiguulimmillu ingerlatsisutulli sukkatiginissaat aamma pingaaruteqarpoq.

- Ajornanngippallu sukkanerusariaqarlutik, taakkumi kalerrisaarinerup aallartinnerata immiunnissaa aamma angumeriniartussaavaat. Taamaammat aquttoq kalerrisaarisoqartillugu uagutsinnut sianertarpoq, kalerrisaarisoqaannartorlu aallariartortarpugut. Jesper Ærø kalerrisaarisoqartillugu qanoq iliortarnertik pillugu oqarpoq.

Tamanut arlaannik nutaaqartoq

Assiliissummik sukkasuumik suliaqarneq Jesper Ærømut imaluunniit Anders Agerbomut nutaarsissaanngilaq, muminganilli SAR-ip qulimiguulianik suliaqarnermi qullersaasup, Paw Hjortstrømip isiginnaagassiortunit qanimut malittarivigineqarnera nutaarluinnaavoq sungiunniagassaq.

- Assiliissummit malittarineqaannaavinneq gropromillu atisaniittuuteqarneq eqqumiilaarpoq, kisianni sungiukkakkit ajunngilaq, 47-nik ukiulik annaassiniartartoq oqarpoq.

Issilluinnarttumili suliaqarneq Paw Hjortstrømimut nutaarsiassaanngitsoq tamanna isiginnaagassiortunut nutaavoq.

- Issittorujussuanngoriataaraat suliniarneq ajornakusuulertarpoq, assakkami inussakkalu immiussininni atortussaavakka. Assersuutigalugu drone-mik filmilioraangama drone aqulluarumallugu aaqqatikka ilaanni peertarpakka, ilaannilu issisiutip 25-30-villu akornanniitsillugu aaqqatikka minutsi ataasiinnannguarluunniit peeqqagukkit inussakka tassanngaannaq malugisinnaajunnaartarpakka, Jesper oqarpoq.

Suli isiginnaagassaqartoq

Jesper Ærøp apersorneqarneranut uteqqikkutta taanna Anders Agerbolu ukiumi ataatsimi isiginnaagassiassaminut immiussinermini annaassiniartartut qanimut attaveqarfigilerpaat. Assiliissutikkuinnaanngitsoq aammali inuttut.

- Suleqatigiit ilaatut misigisimavugut, naak nalunngikkaluarlugu suleqatiginagit, taanna oqarpoq.

Paw Hjortstrøm aamma taama misigisimavoq:

- Taama qanitsigigaanni inuttut qanillilluinnartoqartarpoq, taamaammat suut nuannernerpaanersut oqaatigisinnaanngilara. Inutsialaat suleqatigivagut, taanna oqarpoq.

SAR-imit qulimiguulimmik annaassiniartartut, Jesper Ærøp aamma Anders Agerbop ukiumi ataatsimi malinnaaffigisaat. Assi © : Privatfoto Jesper Ærø.

Isiginnaagassiap immikkortui siulliit soqutiginartilluinnarsimagukkit isiginnaagassiat immikkoortui marluk kingulliit qilanaarutigisinnaagitit, Jesper Ærøp neriorsuutigaa.