Sirius pillugu isiginnaagassiamik ilitsersuisoq: Misigisanni pikkunarnerpaaq
Piviusuinnik tunngavilimmik isiginnaagassianik ilitsersuisup, Lasse Rahbekip inuit misigisinnaasaannik peqqarniitsunik soqutigisaqarpoq, taassumalu Sirius-patruljemi nakkutiginnittut misigisartagaat sakkortunerpaatut eqqarsaatigiuaannarpai.
Tamannalu taassuma nammineq oqarneratut ilumoorpoq. Isiginnaagassiamik ilitsersuisup nammineq kisimiilluni Siriuspatruljemi nakkutiginnittut tunumi ilisimasassarsiorneranni ukiuni pingasuni malinnaaffigai. Taassuma nakkutilliisut filmiliuteeranngualerluni qanimut malinnaaffigai.
Malinnaanera DR-imit isiginnaagassiatut “Sirius”-itut saqqummerpoq, tassanilu immikkoortuni pingasuni Danmarkimi sakkutuunit Sirius-patruljemiittut eqimattat assigiinngitsut pingasut malinnaavigineqarput.
- Misigisimasanni torrannerpaavoq. Aamma ilaatigut misigisimasanni sakkortunerpaallunilu ajornarnerpaajuvoq, Lasse Rahbek oqarpoq.
Sakkortuneraanissamullu pissutissaqarluartoq, Lasse Rahbek isumaqarpoq. Piviusunimmi tunngaveqartumik isiginnaagassiortartutut isiginnaagassiani piviusorpalaartinniarsimavaa. Taamaammat ilisimasassarsiortut naligalugit isiginnaagassiorpoq.
Anaanavit ikiornavianngilaatit
Kikkullu tamarmik Sirius-patruljep suliffigisaani issittorsuarmi pissutsinik uppernarsaanissamut akuerineqarneq ajorput. Ikittuinnaalli kisimik.
Taamaammat isiginnaagassiamik suliaqarnini aamma tulluusimaarutigaa. Pingaartumik nammineerluni inuilaarsuarmi issittorsuarmilu angalaqataanini pissutigalugu.
- Isumaqarpunga Issittup Kalaallit Nunaatalu ilaa killitsinnarlunilu kusanaqisoq. Inuunerup killerpiaaniilluni isumannaallisaateqaranilu, taanna oqarpoq.
AAMMA ATUARUK Issittumi inuilaarsuarmi ukiortaarsiorneq: Nerinitsinni ataasinnguartussaagut
Taannali nunarput Issittorlu pillugit isiginnaagassiornermik misilittagaqareerpoq. Taamaammat tusagassiortorpassuarnut allat periarfissarinngisaat Lasse Rahbekip periarfissaraaa.
- Kalaallit Nunaanni isiginnaagassiannit ilikkagaqaqaanga, tamannalu Siriusimik suliaqarnissannut kissassaataapajaarpoq. Suna nammineq iluatsissinnaanerlugu ilisimavara. Taavunnarama nutaraanngilanga, periarfissinneqarnavianngikkaluarpungami. Nakkutilliisut taavani paarserusunngillat. Inuit imminnut isumagisinnaanissaat qulakkeersimasussaavaat, Lasse Rahbek nassuiaavoq.
Taannali nutaraaffeqarpoq. Taassumami qimusserneq misilittagaqarfiginngilaa, taassumalu ilisimasassarsioqataaqqaarnerani silap pissusia oqallisigineqarluartoq sakkortoqisorlu issittumi inuilaarsuarmi soorunami unammillernartoqartitsivoq.
Allatut inissisimaneq
Lasse Rahbekip nakkutilliisut piviusorpalaarnerpaamik assilerusuppai. Taamaammat qimussimit allamit sakkutuut ilisimasassarsiorneranni malinnaalluni immiussinissaminut isumassarsiareqqaakkani unitsippaa.
- Tamannami qimussimik ingerlasut malinnaaffiginiakkama piviusortavia allanngortilluinnassavaa, taanna oqarpoq.
Taamaammat periarfissaq ataasiinnaavoq: tassa Sirius-patruljemut atugassarititaasut assigalugit ilisimasassarsioqataassaaq.
- Kissassimaartariaqassaatit, sisorassaatit, tupermi sinissaatit assinganillu nerisaqassallutit. Taakku avatangiiserisaat assigalugit inuussaatit, Lasse Rahbek oqarpoq.
Sirius-patruljep qimussii inunnut marlunnut tulluarsagaanerisa saniatigut ingilluni isikkivimmik isiginnaarujoorfigineqarsinnaanngillat. Qimussit qimuttut uniagassaannik oqimaatsunik ulikkaarput. Taamaammat sakkutuut – aamma Lasse Rahbek – qimussit sanianni sisoraateqartariaqarput. Tamatuma saniatigut Lasse Rahbek isiginnaagassiaminut immiussisussaalluni.
Piviusorpalaartoq
Aallaqqaammut malinnaaniarneq ajornakusoorluinnarpoq, sakkutuullu aamma qulalersimagaluartut, Lasse Rahbekip nassuerutigaa.
- Taamaaliorsinnaanngitsugut oqarput. Ilumoornerartariaqarpakka, oqarlunga taamaaliorsinnaanata, kisianni maanna taamaaliorpugut, Lasse Rahbek oqarpoq.
Piffissalli ingerlanerani ilikkarpaa, taamaalilluni filmiliorsinnaalluni, malinnaasinnaalluni nalinginnaasumillu issittumi inuilaarsuarmi uumasinnaalluni.
- Unammillernarnerpaaq tassaavoq nakkutilliisut angalaqatiginissaat. Arpaqataassagaangama filmiliorsinnaaneq ajorpunga, kisianni piareersimasussaallunga, Lasse Rahbek oqarpoq.
Taamaakkaluartorli immiussani iluarusimaarpai.
- Misigisimavunga taavaniinninni ataatsimuussuseq malinnaavigisinnaasimallugu, taanna oqarpoq.
Isiginnaartut isiginnaagassiamit qanoq pissarsiaqarnertik nammineq aalajangissavaat, kisianni inuit kisimiillutik ilungersortut akornanni ikinngutigiinneq pillugu ilikkagaqartitsinissani neriuutigaa.
Taassumalu oqarnera naapertorlugu suliassani pingaarnerpaaq iluatsippaa: tassa Sirius-patrulje pillugu piviusorpalaartumik assiliineq.
- Siriusimiittut tusarfigisartakkakka attortissimasut isiginnaagassiallu misigisaannik oqaluttuarfiusoq tusaraangakku nuannaarutigisarpara. Pingaarnerpaaq tassaavoq isiginnaagassiami piviusunk tunngaveqartumi peqataasut imminnut takusinnaanissaat.
Isiginnaagassiaq “Sirius” DR TV-kkut isiginnaarsinnaavat.
