Issittumi inuilaarsuarmi ukiortaarsiorneq: Nerinitsinni ataasinnguartussaagut

Ilaquttat ikinngutilluakkallu ilagalugit nerisassagissaarluni, imigassaqarluni qummoroortarnertaqartumillu amerlasuutigut ukiortaarsiortoqartarpoq.

Danmarkillu issittumi nakkutilliisuisa nunatsinni tunup avannaarsuaniittut arfininngornermi ukiumut nutaamut 2023-mut isernissamut unnuap qeqqarnissaanut kisitsinerminni aamma taamaaliorniarsaripput.

- Ileqqoq malillugu angerlarsimaffippalaartumik ukiutoqarsiorniartarpugut. Qummoroortartuuteqalaarpugut aamma nerinitsinni iggisissatsinnik ataasinnguartulaassaagut, Tunup avannaarsuani Sirius-Patruljeni aqutsisoq, Andreas Sloth KNR-imut oqarpoq.

Taassuma nammineq ilanngulluni angutit aqqanillit qimuttullu 69-it missaanniittut ukiortaarsioqatigai, taakku tamarmik tunup avannaarsuani nunami allanngutsaaliukkami Station Daneborgimi najugaqarput.

Issittumi Inuilaarsuaq

Angutillu sakkutuut aqqaneq-marluk qummoroortitsinerat takullugu aamma nalinginnaasuusimanavianngilaq. Nunarsuarmimi nunani inoqannginnerpaami, nunarput issittumi inuilaarsuarnik peqarpoq – matumani ilaatigut tunup avannaarsuani nuna allanngutsaaliugaq ilanngullugu.

Taamaammat Sirius-patruljep Danmarkimi sakkutooqarnikkut ilaatigut qimuttut atorlugit nakkutiginninnissaq suliassaraa.

Sirius-patrulje aasaanerani immakkut nunakkullu nakkutilliisarpoq, ukiukkulli pinngortitaq ilummut taqqamunga ammarluartarpoq. Taamaammat Andreas Sloth sakkutooqatinilu qimminik qimuttulerlutik inuilaarsuarmut nakkutilliiartorsinnaalertarput.

- Ukiukkut sikugaangat apigaangallu oktoberip novembarillu missaani qimussersinnaanngortarpugut aasakkut julip aallartinnerani sikuerunnissaata tungaanut.

- Ukiukkut kangerluit sikugaangata nunalu apigaangat qimuttut atorlugit nakkutiginnittarpugut. Tamanna novembarip aallartinnerani aallartittarpoq, sikullu juulip aallartinnerani aannissaata tungaanut taama nakkutiginnittarluta.

Naak Andreas Sloth nakkutilliisullu sinneri suliinnaavikkaluartut issittup inuilaarsuata avataani inuuneqarnera pillugu aamma eqqaasarpaat.

Angerlarsernermut annikillisaaneq

Station Daneborgimi taamaallaat ukiortaarsiortoqarneq ajorpoq. Juullimi nerisassanik juullisiornissamillu sipaartoqarneq ajorpoq.

- Nuannerluinnartumik juullisiorpugut. Nerilluataaqaagut ilaquttatsinniit poortugarsivugut soorlumi angerlarsimaannarluta. Maaniittummi amerlanerit ilaqutaqarput, nuliaqarlutilluunniit aappaqarput. Danmark taamaalilluni ungasissorujussuartut misiginngilarput, Andreas Sloth oqarpoq.

Stationimi orpiliarnissamut aamma piffissaqarpoq.

- Angerlarsimallutik orpiliarnermik sungiusimannittut amigaateqartutut misigisimannginnissaat pillugu orpiliartarpugut. Soorlu Danmarkimiikkaluarutta aamma taamaaliussasugut, Andreas Sloth oqarpoq.

Ukiortaami inuppassuit asasaminnut ukiortaami pilluaqqusillutik sianertarput. Station Daneborgimi aamma taamaaliornissamut periarfissagissaarpoq. Maanimi nunarsuup sinneranut attaveqaatigut ajorisassaanngillat.

- Juullip ulluini ukiutoqqallu nalaani oqarasuaatitigut attavigissaarpugut. Ilaannilu aamma internettikkut attaveqaatit ima pitsaatigisarput videokkut ilaquttavut takusinnaasarlugit. Taamaammat avinngarusimasumi najugaqaraluarluta atugassaritaasut pitsanngoriartorput, Anders Sloth unnersiorpoq.

Sirius-patruljemiittut ukiut marlukkaarlugit nakkutilliisuusarput, ukiullu allortarlugit affai allanik taarserneqartarlutik. Andreas Sloth suli ukiup affaa nakkutilliivimmiissaaq, tamatumalu kingorna aasap kingorna Danmarkimut ilaquttaminut angerlaqqissalluni.

Taannalu nunarsuup sinneranut ima oqaasissaqarallarpoq:

- Nalinginnaasumik maani ajunngitsorujussuusarpugut, maaniinnerput suliassatsinnillu suliaqarsinnaanerput nuannaraarput.