Nunatta qaammataasassaa silaannarsuarmiilersoq
Tusassip qaammataasartaava ippassaq ataasinngornermi silaannarsualiartinneqarpoq.
Tusass tusagassiorfinnut nalunaarummi allappoq.
GreenSAT SpaceX-imit avataarsualiartaammik Falcon 9-mik Amerikami Floridamit aallartinneqarpoq.
Taanna sapaatiummat silaannarsualiartinneqarnissaa pilersaarutaagaluarpoq, silalli atoruminaannera peqqutigalugu ataasnngornermi aatsaat silaannarsualiartinneqarpoq.
AAMMA ATUARUK Toqqaannartoq: Nunatta qaammataasaa silaannarsuarmut aallartinneqassaaq
Qaammataasap taassuma nunarput tamakkerlugu internetimut attaveqaataa pitsaanerulersissavaa. Qaanaami tunumilu attaveqaatinut pitsaanerulersitsinissaa pingaartumik malugineqarumaartoq, Tusass allappoq.
Interneti pisaanerulissasoq
Qaammataasap nunatta avannaani tunumilu attaveqaatit pitsaanerulersissavai, Qaanaamiilu interneti sukkasooq atorsinnaalissalluni.
- Kalaallit Nunaannut qaammataasatigut attaveqaatit pitsanngorsarnissaat annertusarneqarnissaallu Tusassimut suliniutaavoq annertooq, Tusassimi pisortap, Kristian Reinert Davidsen, oqarpoq nangillunilu:
- Kalaallit Nunaata ilaani sumiiffinni qaammataasakkut attavilersugaasuni radiokædikkut immap naqqatigullu kabelikkut attavilersorneqarnermut sanilliullugu inissisimasunut maannakkumiit aalajaannerusunik pitsaanerusumillu attavilersorneqarnissaa sapinngisarput tamaat anguniagaraarput.
AAMMA ATUARUK Nunatta satellitsitaassaata nunarput internetimut attaviginnerulersissavaa
Tusassimi siulersuisuni siulittaasoq, Ulrik Blidorf qaammataasap aallartinneqarmat qarasaasiakkut malinnaavoq.
- Nuannaarutigeqaara tulluusimaarutigeqalugulu Kalaallit Nunaannut qaammataasanik atuinerup tungaatigut siuariarnermut peqataasinnaasimagama. Ingammik Kalaallit Nunaata avannaanut, Kalaallit Nunaata kangianut minnerunngitsumillu savaatilinnut aatsitassarsiorfinnullu iluaqutaasussamut ingerlariaqqittoqarmat aamma nuannaarutigeqaara, taanna oqarpoq.
Qaannataasaq Floridamit Orlandomit aallartinneqarpoq. Qaammataasap nunatta avannaani tunumilu attaviit aalaakkaannerulersissavai. Assi: Tusass.
