Partii nutaaq Det Demokratiske Partimik ateqartoq mingutsitsinnginneq, inuit pisinnaatitaaffii Danmarkillu aningaasatigut nutanik isaatitsinissaa - Kalaallit Nunaatalu siunissaanut pilersaarut ukkatarai.

Danmarkimi partii nutaaq teknologeeqarfissuarmik nunatsinni illoqarfiliorniartoq

Det Demokratiske Partiip Danmark nunatsinnut milliardilikkaanik aningaasaliisinniarpaa, illoqarfinnillu mingutsitsinnginnerunermik, piujuartitsinissaq aallaavigalugu suliniutinik qarasaasiaqarnermillu ineriartorfiusunik pilersitsisinniarlugu.

Danmarkimi partiit nutaat Folketingimiilerniartut amerlapput.

Partiit nutaanersaat Det Demokratiske Partimik ateqartoq sapaatit-akunnerata siuliani saqqummersinneqarpoq.

Partiillu liberaliusup mingutsitsinnginneq, inuit pisinnaatitaaffii Danmarkillu aningaasatigut nutanik isaatitsinissaa - Kalaallit Nunaatalu siunissaanut pilersaarut ukkatarai. Det Demokratiske Partiip siulittaasua, Peter Hjorth KNR-imut taama oqarpoq.

- Danmarkip Kalaallit Nunaannut aningaasaliingaatsiarnissaa ineriartortumillu illoqarfiliornissaq pillugu siunissaq ungasinnerusoq eqqarsaatigalugu pilersaarusiornissarput kissaatigaara. 30 milliardit koruuninik aningaasaliinissaanut pilersaarusiorusuppunga.

AAMMA ATUARUK Forsker om efterårssamlingen: Finanslov, isbjørne og Nuugatsiaq skal du holde øje med

Illoqarfiit ineriartortitsiviusut danskit illoqarfissuisa eqqaanniissasut, ataaserlu Kalaallit Nunaanni suli nassuiarneqanngitsumiissasoq, siulittaasoq oqarpoq. Illoqarfiillu Danmarkimut nunatsinnullu iluaqutaassapput.

- Ineriartorfiusunik illoqarfiliolrnissami siunertaat marluupput: Niuernikkut kiffaanngissuseqarneruniassagatta tamatsinnit aningaasarsiornissaq, teknologiimik mingutsitsinngitsumik pilersitsinissaq Issittorlu pillugu silap pissusiani ilisimasassarpassuaqarnissaq. Taamaalilluni Kalaallit Nunaata, Danmarkip nunarsuullu sinneraniittut teknologiit nutaat atorluarsinnaassavaat, tamannalu naggaterpiaani silap pissusianut annaassisuussalluni, Peter Hjorth oqarpoq.

Inuit 100.000-init amerlanerusut illoqarfinni ineriartortitsiviusuni najugaqarlutik sulissapput, tamannalu nunani allamiunik immikkut ilisimasalinnik tikisitsinikkut ilaatigut pissaaq. Illoqarfiillu nammineq qaffasinnerpaaanik atuarfeqarfeqarlunilu ilisimatusarfeqassapput.

- Illoqarfiup ineriartortitsiviusup ataatsimoorfiungaatsiartuunissaa, piginnaasaqarnerpaanit taakkualu ilaqutaannit suliffeqarfinnik danskit suliffeqarfiit annerpaat nunamilu allamiut suliffeqarfiissui peqatigalugit suliffissualiortussanit najugaqarfiunissaa pilersaarutigaarput, Peter Hjorth oqarpoq.

Taassumali inuit nunatsinniittut pilersaarutit pillugit oqalliseqatigisimanagit erseqqissaatigaa. Nunatsinnullu tikeraarnissaanut pissutissaqarluarpoq.

Siulittaasoq: Kalaallit Nunaata namminiilivinnissaanut piffissaanngilaq

Partiip anguniagaasa nassuiaatigineqarnerani Det Demokratiske Partiip naalagaaffeqatigiinnerup attanneqaannarnissaa ineriartortinneqarnissaalu kissaatigigaa atuarneqarsinnaavoq.

Tamanna danskit naalagaaffiata, soraarnerussutisiaqarfiit aningaasaatinillu aningaasaateqarfiit ikiorsiineratigut pissaaq, taakkulu kalaallinut inuiaqatigiinnut milliardilikkaanik aningaasaliissuteqartariaqarput.

Partiilli Kalaallit Nunaata namminiilivikkusunnermik kissaateqarnera nassuerutigaa. Kalaallit Nunaatali aningaasaqarnikkut politikikkullu maannakkut inissisimanera pissutigalugu namminiilivinnissamik eqqarsaateqarneq mianernartumik inissisimasoq, Peter Hjorth isumaqarpoq.

- Kalaallit Nunaata namminiilivissaguni piareersimalluarnissamut inuiaqatigiinninnik suli nukittunerusunik pilersitsinissamut utaqqinissaa nunap soqutigisaaniittoq qularnarsorinngilara. Avissaarneq ajorluinnassaaq, arlaatigullu ingerlanerluttoqalissalluni.

Tassunga taarsiullugu Kalaallit Nunaat Danmarkilu nunanut allanut tunngasunut politikkikkut suli qaninnerusumik suleqatigiittariaqarput, taavalu uumasut atugarissaarnerunissaat anguniarlugu pilersaarusiorluakkamik suleqatigiinnissamut, silap pissusianut inuillu pisinnaatitaaffiinut tunngatillugu pissutsinik pitsanngorsaanissamut pilersaarusiorlutik.

AAMMA ATUARUK Ukiakkut ataatsimiinneq isumaqatigiinngiffiulluni aallartissasoq: Naalakkersuisut marluk navianartorsiortut

- Tassani Namminersorlutik Oqartussat peqatigalugit amerikamiut, russit, kinamiut canadamiulluunniit ataatsimeeqatigisinnaavagut, taakkulu Kalaallit Nunaanni qanoq soqutigisaqarsinnaanersut tusarniarlugu. Tamannalu nunani killerni nunat iligiivinik nunat allat silap pissusia inuillu pisinnaatitaaffii pillugit unammillernartinnerpaasaannut ikiuisinnaasunik pilersitsinissamut isumaqatigiissuteqarnissamut atorsinnaassagigut neriunarpoq, Peter Hjorth oqarpoq.

Savalimmiut partiip anguniagaani eqqaaneqanngilaq. Arajutsinerunngitsorli, siulittaasoq oqarpoq.

- Kalaallit Nunaannimi nunanut allanut tunngasunut politikkikkut allatigullu siunissami aggersumi soqutiginartut Savalimmiuni soqutiginalersinnaasunit amerlanerupput.

Det Demokratiske Partiip siulittaasua, Peter Hjorth partiimi Klaus Riskær Pedersenimut – maanna Borgerlistenimik atserneqarsimasumut ilaasortaanikuuvoq. Partiimi pilersitseqataasoq alla tassaavoq sikkilertartuusimasoq, Bo Hamburger.

Isumaginninnermut nunamullu namminermut ministereqarfik naapertorlugu Det Demokratiske Partii qinersisartut atsiornerinik maannamut 28-nik pissarsereerpoq. Partiit Folketingimut qinigassanngortitsisinnaanissaannut ikinnerpaamik 20.182-inik atsiortoqarsimanissaa piumasaqaataavoq.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat