Danmarkimi ministeri sapaatit akunneri marluk ministerioreerluni tunuarniuteqartoq

Sapaatit akunneri marluk.

Mia Wagner, Venstre sinnerlugu digitalimik sullissinermut naligiissitaanermullu taama sivisutigisumik, immaqaluunniit sivikitsigisumik ministeriuvoq. Taanna ministeritut ullumi sisamanngornermi tunuarpoq.

Ministeriunerup allattoqarfia tusagassiorfinnut taama nalunaaruteqarpoq.

Mia Wagner iluaallernermi kingorna napparsimasutut sapaatit akunnerata siuliani nalunaarutigineqarpoq. Taanna uummallunnini pillugu ukiut tallimat matuma siornatigut suliaritippoq.

Mia Wagner Folketingimut ilaasortaanngilaq,  DR-illi aallarnisaasut pillugit aallakaatittagaani "Løvens Hule"-mi peqataasartutut ilisimaneqarluni.
Aallarnisaasut aningaasaliisussanik ujartuinerminni aallakaatitassiami tassani peqataasarput, Mia Wagnerilu aningaasaleeqataassanerluni tassani aalajangiisarpoq.

Mia Wagnerili ministeritut maanna tassa tunuarniuteqarpoq. Siuliani ministeri Marie Bjerre maanna ministerinngoqqissaaq.

Mia Wagner, inoqatinut attaveqaqatigiittarfikkut Instagramikkut ima allappoq:

- Qaqugu piareeqqissanerlunga naluara. Naalakkersuisut Venstrelu, uangalu nammineq isumaqarpunga ministeritut atuuffik piffissaligaanngitsumik inuttaqanngitsoq atorneqarsinnaanngitsoq, Mia Wagner oqarpoq.

Mia Wagnerip ministeritut ingerlaqqissinnaannginnera ajuusaarutigalugu, Venstrep siulittaasuata Troels Lund Poulsenip tusagassiorfinnut nalunaarummi ilaatigut oqaatigaa.

- Politikkimmulli naleqqiullugu pingaarnerusoqarpoq. Miap aalajangernera paasilluarlugulu ataqqivara, taanna oqarpoq.