Danmarkimi innuttaasunik ullumikkut taasititsisoqarpoq

Taasisitsineq angernermik inerneqassappat Danmarkip ilaannginnera nammineq toqqaasinnaanermik aaqqissuussininngortinneqassaaq inatsisiliornerullu iluani sutigut Danmark tunniussaqassanersoq Folketingimit aalajangiiffigineqarsinnaanngussalluni.

Sapaatit-akunnerini arlalissuarni qineqqusaarneq ingerlareeraluartoq innuttaasunik isumasiuinerit kingulliit takutippaat angertut naaggaartullu naligiingajattut. Innuttaasunik isumasiuinerup Megafonip TV2 sinnerlugu ingerlassimasaa ullaaq manna saqqummiunneqartoq naapertorlugu 39 procentit akuersissangatinneqarput 42 procentillu missaat naaggaassangatinneqarlutik.

Qinersisartut 17 procentii sinnerlugit suli nalornipput.

Aamma Danmarkimi innuttaasunik taasititsinernut allanut naleqqiullugu qinersisartut amerlanerusut taasivinnik allaffigineqarsimanngitsunik taasinissaat imaluunniit taasinngitsuuinnarnissaat ilimagineqarpoq.

AAMMA ATUARUK EU Danmarkimut inatsisiliortarpoq - Danmark naalagaaffeqatigiinnut

Folketingimi amerlanerussuteqartut, partiit Venstre, De Konservative, Socialdemokraatit, SF aamma Alternativet taasitsinermi angernissamik kajumissaaripput, namminerlu toqqaasinnaanermik aaqqissuussinermut naaggaaqqusisut tassaallutik Dansk Folkeparti, Liberal Alliance aamma Enhedslisten.

Innuttaasunik taasititsineq Nunatsinnut Savalimmiunullu, naluneqanngitsutut EU-mut ilaasortaanngitsunut, sunniuteqassanngilaq.

Danskit ullumikkut angissappata inatsisiliornikkut suliassaqarfiit Danmarkip Bruxellesimit aalajangersaaffigilersitaanut tunngasuni Folketingimi Nunatsinnut Savalimmiunullu immikkut inatsisiliortoqaannassasoq danskit nunami namminermi pissutsinut ministereqarfiata siornatigut iliimatitsissutigereerpaa.

Qinersiviit Danmarkimi nalunaaqutaq malillugu unnugu arfineq-pingasunut matussapput, taasititsinerullu inernerata Danmarkimi nalunaaqutaq malillugu unnuap-qeqqanngitsoq saqqummiunneqarnissaa naatsorsuutigineqarpoq.