EU Danmarkimut inatsisiliortarpoq - Danmark naalagaaffeqatigiinnut

Taama pisoqariaannaavoq danskit EU-mi eqqartuussiveqarnikkut suleqataannginnertik atorunnaartissappassuk.

Aaqqissuussineq eqqumiittuusoq savalimmiormiu folketingimut ilaasortaq Sjudur Skaale isumaqarpoq.

- EU'p eqqartuussiveqarnikkut nunani allamiullu pillugit malittarisassai Danmarkimi atuutiinnassanersut decembarip pingajuanni Danmarkimi taasissutigineqassapput.

Aamma atuaruk Innuttaasut taasitinneqarnissaat Nunatsinnut sunniuteqarsinnaavoq

Danmarkip EU'p inatsisai taakku marluk ullumikkut atunngilai.

Taamaakkaluarpalluunniit Kalaallit Nunaanni Savalimmiunilu inatsisit eqqartuussiveqarnermut- nunani allamiunullu tunngasut Danmarkip aalajangersartassavai.

Kalaallit Nunaata Savalimmiullu Folketingimi ataatsimiititaliaata apeqqutaanut Inatsisinik atuutsitsinermut ministereqarfik taama akissuteqarpoq.

Savalimmiut Folketingimi ilaasortaatitaat Sjurdur Skaale, Socialdemokratineersoq ammaanermi oqalungiarnermini taama oqarpoq.

- Paasinnittaasera malillugu periarfissat marluupput. Oqartussaaffiit taakku Savalimmiut tigusinnaavaat, imaluunniit Danmark Folketingiluunniit taakku eqqarsaatigalugit Savalimmiut sinnerlugit inatsisiliortuusinnaapput. Savalimmiunut tunngassuteqanngitsut tamaasa EU-mut aalajangingassanngortinneqassappata, taava Folketingi Savalimmiuni inatsisiliornikkut pissaaneqartunngussaaq.

Inatsisinilli atuutitsinermut ministereqarfik naapertorlugu,  danskit akuersissappata tamanna Kalaallit Nunaannut Savalimmiunulluunniit sunniuteqarnavianngilaq. 

Folketingimi  Kalaallit Nunaannut Savalimmiunulluunniit immikkut inatsisiliussappat Inatsisartut Lagtingiluunniit suli tusarniaavigineqaqqaartassapput.

Taamaakkaluarpalluunniit pissaanermik agguaassineq assut suli eqqumiittoq, Skaale isumaqarpoq. Taamaattumik inatsisit eqqartuussiveqarnermut nunani allamiunullu tunngasut kalaallinit savalimmiormiunillu tiguneqartariaqartut taanna isumaqarpoq.

- Taava Lagtingi arlaannik akuersissuteqartariaqarpoq kissaateqarluniluunniit, pissaanerli Københavnimi Folketingimiimmat, taava Folketingi Savalimmiunuinnaq atuuttussanik inatsisiliortariaqarpoq. Ajornakusuussangaluarpoq, taamatulli suliarisariaqassaaq. Ajornanninnerpaassaarli suliassaqarfiit angerlaatiinnaraanni, Skaale oqarpoq.

Nunani allamiunulli tunngassutillit Kalaallit Nunaata maanna Danmarkimiit tiguniarlugit sulissutigivai.