Innuttaasut taasitinneqarnissaat Nunatsinnut sunniuteqarsinnaavoq

EU-mi inatsisilerinermik suleqatigiinnermut Danmarkip ilaannginnera Danmarkimi innuttaasunit taasissutigineqartussaavoq, naallu Kalaallit Nunaat EU-mut ilaasortaanngikkaluartoq Nunatsinnut tamanna sunniuteqarsinnaavoq.

Tassami inatsisit nutaat atuutilersussat Kalaallit Nunaanni Savalimmiunilu politiinut sunniuteqarsinnaassapput.

Danmarkip EU-mi inatsisinut atuuttunut assigiinngitsunut ilaatinneqannginnera pillugu Danmarkimi innuttaasut taasitinneqarnissaat, Danmarkimi naalakkersuisut partiillu allat pingasut qanittukkut isumaqatigiissutigaat, politiinut eqqartuussiveqarnermullu inatsisit matumani immikkut inissisimatinneqarnerat pillugu taasisoqassalluni.

Danmarkip inatsisit atuuttut ilaannut ilanngussinnaanissaa periarfissaasariaqartoq isumaqatigiissutigineqarpoq. Kalaallit Nunaanni Savalimmiunilu politiit naalagaaffiup politiivisa qullersaqarfiata ataani inissisimammata tamaani politiit sulinerannut sunniuteqarsinnaasoq, Danmarkip inatsisinik atuutsitsinermut ministereqarfiata KNR-imut ilisimatitsissutigaa, eqqartuussiveqarnerlu matumani aamma ilaasoq erseqqissaatigineqarluni.

Akiuiniarneq pitsaanerusoq

Nunat assigiinngitsut akornanni pinerlunniartarnerit annerusumik taaneqarput, inatsisillu Danmarkip maanna ilaaffiginngisai atuutilersinneqarpata nunat akornanni pinerlunniartarnerit aaqqissugaanerusumik akiorniarneqarsinnaalissapput.

Danmark EU-mi inatsisinut maanna atuuttunut ilaatinneqanngippat, assersuutigalugu Danmark Europami nunat politeeqarnikkut suleqatigiiffianni Europolimi sulinermit ilaatinneqanngitsooratarsinnaavoq.

Danmarkimilu innuttaasut akuersissappata malittarisassat nutaat katillugit 22-t Danmarkimut aamma atuutilersinneqarsinnaassapput.

Inunnik anngiorluni eqqussisarnerit, meeqqanillu kinguaassiuutitigut atornerluisarnerit akiorniarneqarnerat EU-mi nunat akornanni assigiinnerunissaat anguniagaavoq. Assersuutigalugulu nunani allani eqqartuussisoqalerpat nunat assigiinngitsut takussutissanik paarlaasseqatigiissinnaanissaannut malittarisassat assigiiaarnerunissaat sulissutiginiarneqarpoq.

Malittarisassalli nutaat tamakku Danmarkimi innuttaasunit politikerinillu akuersissutigineqareerpata aatsaat Nunatsinnut Savalimmiunullu qanorpiaq sunniuteqarumaarnersut paasinarsiumaarpoq.

Inatsisinilli allannguisoqassappat, Kalaallit Nunaannullu tamanna sunniuteqassappat, taava Inatsisartunut tusarniaassutigineqaqqaassasut, Inatsisinik atuutsitsinermut ministereqarfiup nalunaarutigaa.

Danmarkimi innuttaasut EU-mi inatsisilerinermik suleqatigiinnermut Danmarkip ilaannginnera pillugu kingusinnerpaamik aappaagu marsimi taasitinneqartussaapput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat