Danmarkimi tunillatsissimasut aatsaat taama amerlatigisut: Coronavirusimik tunillatsittut nutaat 678-it uppernarsarneqartut
Danmarkimi coronamik tunillatsissimasut nutaat 678-it uppernarsarneqarput.
Statens Serum Institutimit kisitsisinik ullormut nutarterinerup tamanna takutippaa.
Coronamik tunillaassuunnerup Danmarkimi marsimi tunillaassuutilerneranit aatsaat taama amerlatigisut ullup ataatsip ingerlanerani uppernarsarneqarput.
Amerlanerungaatsiartulli nappaammik tunillatsissimanermut maanna misissortittalernerat pissutaaqataavoq. Taamaammat annikinnerusunik ersiuteqartut aamma paasineqarsinnaanerannik isumaqarpoq.
Coronamik tunillatsissimasutut ullormi ataatsimi uppernarsarneqartut aatsaat siullermeertumik 600-init amerlanerupput.
AAMMA ATUARUK Corona: Angerlarsimaannarnissamut piumasaqaateqaleqqissinnaasoq
- Napparsimmaviit piffissami matumani malinnaasinnaapput, isumalluutittali qanoq atornissaanut eqqarsalernissatsinnut piffissaq sivisunavianngilaq.
Bispebjerg Hospitalimi nakorsaaneq, Christian Wanberg coronamik tunillatsissimasut amerlassusaat pillugit oqarpoq.
Covid-19-imik napparsimasut katillugit 101-it Danmarkimi napparsimmavinni uninngapput. Taakku sisamanngornermit arfinilinnik ilaqqipput.
AAMMA ATUARUK Tamaat isigalugu: Coronavirus pillugu killiffik
Christian Wanbjergip oqarnera naapertorlugu tunillatsimasut amerlanerpaaffissaat suli tikinneqanngilaq - tunillatsittut amerlassusaat maannakkut napparsimmavinni ullut 14-it qaangiuppata aatsaat takuneqarsinnaalissapput.
- Ullut 14-it matuma siorna pisut napparsimmavinni maannakkut takusinnaavagut. Ulluni makkunani tunillatsissimallutik uninngasut pingasoriaammik amerlanerupput, taamalu ingerlasoqaannassappat ullut 14-it qaangiuppata taakku pingasoriaatinngorsinnaapput, nakorsaaneq erseqqissaavoq.
Juunip ulluisa pingajuannili 100-init amerlanerusunik napparsimmavimmi uninngasoqarmat aatsaat taama amerlatigeqqipput.
Napparsimmavimmi uninngasunit 25-t peruluttut uninngavianniipput, taakkunanngalu qulingiluat anersaartuuteqartinneqarlutik. Sisamanngormat 19-it peruluttut uninngavianniipput, tallimallu anersaartuuteqartinneqarlutik.
Danmarkimi covid-19-imik tunillatsissimanermi kingorna toqusut marlunnik ilaqqipput. Danmarkimi nappaammik toqquteqartut taamaalillutik katillugit 647-nngorput.
