Danmarkimi coronamik tunillatsissimallutik toqusut amerlisut unitsinneqartullu ikilisut
Danmarkimi coronamik tunillatsissimasut amerliartorput napparsimmavimmullu unitsinneqartut ikiliartorlutik.
Tamanna Statens Serum Institutimit kisitsisit nutaat takutippaat.
Danmarkimi coronamik tunillatsissimallutik toqusut pingasunngornermi 218-inngorput. Taakkulu marlunngornermi naatsorsuinermit 15-inik amerlanerullutik.
Coronamik tunillatsissimatillutik toqusut ilumut coronavirusimik toqquteqarnersut qulakkeerlugu oqaatigineqarsinnaanngilaq, taakkunanngami amerlasuut allanik nappaateqareerput.
AAMMA ATUARUK Danmarkimi coronavirusimik toqquteqartut maanna 203-usut
Danmarkimi coronavirus pissutigalugu napparsimmavinni uninngasut pingasunngornermi 453-iupput. Taakkulu marlunngornermit 19-inik ikinnerullutik.
Pingasunngornermi ikilisimaneratigut unitsinneqarsimasut apriilip aallaqqaataani amerlanerpaallutik 535-unerata kingorna unitsinneqartut ullut arfineq-marlussaannik ingerlaannartumik ikiliartorput.
Napparsimmavinni uninngasunit 453-init 127-t peruluttut uninngavianniipput. 127-niillu 103-t peqqiingaaramik anersaartuuteqartinneqartariaqarput.
Peruluttut uninngavianniittut anersaartuuteqartulluunniit amerlassusaat marlunngornermit pingasunngornermut allanngunngillat.
Danmarkimi tunillatsissimasut pingasunngornermi 5386-itut naatsorsorneqarput. Taakkulu marlunngornermiit 315-inik amerlanerullutik.
AAMMA ATUARUK Eksamener i 9. og 10. klasse i Danmark er aflyst
Coronaviruseqarnermut ersiuteqartut tamarmik misissorneqartanngillat. Taamaammat tunillatsissimasut amerlanerungaatsiarnissaat nalilerneqarpoq.
Tunillatsissimasut pisortatigut uppernarsarneqarsimasut 30-eriaataannit 70-eriaataat virusimik tunillatsissimasinnaasut Statens Serum Institutip nalilerpaa.
Tamatumani Islandimi Tysklandimilu misilittakkat tunngavigineqarput. Tamatuma saniatigut danskit 1000-it aammik tunisisartut misissorneqarnerat aallaavigalugu nalilerneqarpoq.
Coronamik tunillatsissimasut amerlanerpaartaat angutaasaraluartut maanna tunillatsissimasutut uppernarsarneqartut arnaanerupput.
AAMMA ATUARUK Danskit naalakkersuisuisa Danmark poorskip kingorna arriitsumik ammariartoqqinniaraat
Statens Serum Institutimit kisitsisit naapertorlugit inuit 5386-it tunillatsissimapput, taakkunanngalu 2933-t arnaallutik, tassa tunillatsissimasut 54 procentii.
Tunillatsissimasut angutaanerunerannit arnaanerulernerat marsip aqqaneq-aappaanni nikissimarpasippoq, piffissami tassani oqartussat tuniluuttoqannginnissaanut iliuusissiaqarnermiit pakkersimaariniarnermut iliuusissamik atuilerput.
Inuit 57.535-t coronamut maannamut misissorneqarsimapput.
/ritzau/