Aviisi: Danmarkimi aqquserngit ilaat Eskimovejimik ateqarunnaassagunartoq

Oqaaseq eskimo oqallisaaqqippoq.

Tamatumuunali oqallisaasoq tassaavoq, Danmarkimi Aarhusip avannaani aqquserngit ilaat, Eskimovej.

Danmarkimi aviisit ilaat, Århus Stiftstidende, taama allappoq.

Aarhus Byrådimi ilaasortaq Socialdemokratineersoq, Steffen Wich, aqquserngup taassuma allamik atserneqarnissaanik teknikkeqarnermik ataatsimiititaliamut siunnersuuteqartuuvoq.

- Aqquserngup allamik ateqalernissaa sulissutaalertariaqarpoq. Ullutsinnut tulluarunnaarnikuummat, aqqusineq taanna Eskimovejimik ateqarunnaartariaqarsoraara, Steffen Wich Århus Stiftstidendemut oqarpoq.

Eskimovej Arhusip ilaani aqqusinernut allanut Issittumut attuumassutilimmik atilinnut ilaavoq.

Aarhus Byrådimili ilaasortat Steffen Wichip siunnersuutaanik ilaliinngitsortaqarput. Aqquserngummi taassuma Eskimovejimik ateqarnera ajoriffissaqartinngikkini, Århus Byrådimi ilaasortat ilaat Danmarksdemokratineersoq Jakob Søggard Clausen Jyllands-Postenimut oqarpoq.

- Aqqusinertaarmi Eskimovejimik atsernavianngilarput. Naggueqatigiilli inuit eskimomik taasarnikuuagut. Aqquserngulli taassuma aqquserngit allat Issittumut attuumassutilimmik atilinnut ilaammat tamanna paasineqarsinnaassasoq ilimagaara. Taamaammat Eskimovejimik ateqarnera naleqquttoq isumaqarpunga, taanna oqarpoq.

Oqaaseq eskimo aatsaat oqallisigineqalinngilaq. Danmarkimimi sikuliorfiup Hansens Is-ip sikuliami ilaata, tassa Eskimo-is-ip, atia allanngortillugu O’Payomik 2020-mi atserpaa.

Hansens Is-ip taamaaliorneraniit ukioq ataasiunngitsoq qaangiummat, Danmarkimi sikuliorfiup allap, Friskop, sikuliami ilaata, Kæmpe Eskimop, atia aamma allanngortillugu Solbær Stangimik atserpaa.

Danmarkimi oqaatsinik aalajangiisartut oqaaseq eskimo ammip qalipaataanik assigiinngisitsinertut isigineqarsinnaasutut nalilermassulli, oqaaseq eskimo oqallisaasaarpoq.