Danmark naaggaanngiinnalerpoq
Siunnersuulli arfanniarneq pillugu Danmarkimi kommissærip, Ole Samsingip, Jerseymi ataatsimeersuaqataasup, imatorsuaq soqutiginngilaa.
- Suunngilaq! Teknikimut tunngasorpassuit, appisaluussinerpassuillu. Nuna arfanniarfissuusoq, Japan, nunanit siuarsarniakkanit piitsunit, Arfanniarneq pillugu ataatsimiititaliarsuarmut ilaasortaasunit, tapersersortissarsiorluni Japan imminut niuerutigisarnerarlugu tulunnit unnerluutigineqarpoq.
Pisuutitsinerilli uppernarsaatissaqanngillat, aamma tulunnit naami, Ole Samsing erseqqissaavoq.
Siunnersuummut naaggaarniarluni Danmark aalajangersimagaluarpoq, nunanit EU-mut ilaasortaasunit 27-iusunit kisimiilluni. Tuluilli oqariartuumminni annikikkaluamik allanngortiterimmata, Danmark tuluit siunnersuutaannut akuersaalerpoq.
Danmarkip allamik isumaqalerneranut pissutaasinnaavoq Danmarkimi naalakkersuisut pinngitsaalisaasutut misigimammata.
Arfanniarneq pillugu Danmark, Kalaallit Nunaannut Savalimmiunullu attaveqarnini pissutigalugu, Arfanniarneq pillugu ataatsimiititaliarsuarmi ikinngutit akeqqallu akornanni inissisimavoq. Pinngortitaq pillugu nunarsuaq tamakkerlugu suliniaqatigiiffik, WWF, nunanut allanut tunngassutilinnut Danmarkimi ministerimut, Lene Espersenimut, sapaatip-akunnerani kingullermi allappoq, Danmark naaggaarniarnini taamaatillugu tuluit siunnersuutaannut akuerseqqullugu.
- Nunarsuaq tamakkerlugu suleqatigiinnermut pingaarutilimmut piumasarisat Arfanniarneq pillugu ataatsimiititaliarsuup naammassisinnaassappagit siunnersuut pisariaqarpoq, Pinngortitaq pillugu nunarsuaq tamakkerlugu suliniaqatigiiffimmeersoq, Gitte Seeberg isumaqarpoq.
