Nutaarsiassaqartitsivik: Danmark Kalaallit Nunaanni illersornissamik isumaqatigiissummik naammassinninngilaq
Danmark Illersornissaqarfiup timmisartuata Challengerip umiarsuinilu alapernaarsuutini Thetisitut ittuni ikinnerpaamik ataaseq Kalaallit Nunaanni ujaasinissanut annaassiniarnissanullu ukioq kaajallallugu piareersimasarnissaannik 2016-imi isumaqatigiissummik naammassinninngilaq.
Nittartakkakkut nutaarsiassaqartitsivik Altinget taama allappoq.
Timmisartoq Challenger 2023-mi katillugit 365-inik ulloqartumi ulluni taamaallaat 239-ni piareersimasimasoq, Danmarkip illersornissamut ministereqarfiata aamma Issittumi Illersornissaqarfiup kisitsisaataasa Altingep pissarsiarisimasaata takutippaat.
Illersornissaqarfiup umiarsui alapernaarsuutit Thetisitut ittut siorna ukioq kaajallallugu aamma piareersimasussaagaluartut ulluni 283-iniinnaq aamma piareersimasimapput.
Illersornissaqarfiup timmisartua Challenger umiarsuilu alapernaarsuutit Thetisitut ittut Kalaallit Nunaanni 2023-mi katillugit ullut unnuillu arfineq-marlunni piareersimasimanngitsut, Issittumi Issittoqarfiup kisitsisaataanni erserpoq.
Tamanna naammaginanngitsoq, Danmarkip ministeriunerata Mette Frederiksenip (S) tusagassiortunik Aalborgimi timmisartoqarfimmi katersortitsinermi nassuerutigaa Kunngeqarfimmilu upalungaarsimanerup sutigut tamatigut nukittorsarnissaa Folketingimi sulissutigineqaleruttortoq oqaatigalugu.
Danmarkip nunatsinni alapernaarsuisuuffigisamini Danmarkimisulli upalungaarsimanissaa naatsorsuutigilluinnarini, naalakkersuisut siulittaasuata tusagassiortunik taamanikkut katersortitsinermi aamma erseqqissaatigaa.
- Danmarkip nunatsinni oqartussaaffinni suli akisussaaffigisamini suliassaasunik naammassinnittartoq ajoquteqanngitsunillu atortoqarnissaanik qularnaarisartoq naatsorsuutigaara.
Isumaqatigiissummik naammassinninnginnerup kingunerisinnaasaasa sapinngisamik minnerpaaffissaaniitsinnissaat sulissutigigitsik, Issittumi Sakkutooqarfiup pisortaa aamma generalmajoriusoq Søren Andersen oqarpoq.
Folketingimi partiit illersornissaq pillugu nutaamik isumaqatigiinnialeruttorput. Atlantikup Avannaani alapernaarsuinerunissamut nutaanik umiarsuarsinissamut aningaasaliinissaq tassani isumaqatigiissutaassangatinneqarpoq.
